جاستارعا ارنالعان ارەندالىق باسپانا: ەلوردادا وتىنىشتەردى قابىلداۋ باستالادى

بۇل تۋرالى ءماسليحات وتىرىسىندا نۇر-سۇلتان قالالىق قوعامدىق دامۋ ىستەرى باسقارماسىنىڭ باسشىسى تالعات راحمانبەردى ءمالىم ەتتى، دەپ حابارلايدى قازاقپارات.

«مەملەكەت باسشىسى بيىلعى جولداۋىندا الەۋمەتتىك ساياساتتىڭ باسىم باعىتى قولجەتىمدى باسپانامەن قامتاماسىز ەتۋ ەكەندىگىن ايتتى. اعىمداعى جىلدىڭ قاراشا ايىندا جۇمىسشى جاستارعا ارنالعان جالدامالى 1050 پاتەرگە وتىنىشتەردى قابىلداۋدى باستايمىز. وتىنىشتەر Smart Astana پلاتفورماسى ارقىلى جۇزەگە اسىرىلادى»، - دەدى ول.

بۇعان قوسا، باسقارما باسشىسى جاستاردى قولداۋ باعىتىندا جۇرگىزىلىپ جاتقان شارالارعا توقتالدى.

«بيزنەستىڭ جول كارتاسى 2020» باعدارلاماسى شەڭبەرىندە جاس كاسىپكەرلەرگە گرانتتار بەرىلەدى. بيىل 63 جاس كاسىپكەر گرانتقا يە بولدى»، - دەپ قوستى راحمانبەردى.

قالا اكىمدىگىنىڭ اقپاراتىنا سايكەس، الەۋمەتتىك از قامتىلعان وتباسىلاردىڭ بالالارىن قولداۋعا دا باسا نازار اۋدارىلادى. ماسەلەن، بيىل تۇرمىسى تومەن وتباسىلاردا تاربيەلەنەتىن 165 بالا گرانتقا يە بولدى. ونىڭ 140 ى اقپاراتتىق-كوممۋنيكاتسيالىق تەحنولوگيالار، ينجەنەرلىك، اۋىلشارۋاشىلىعى جانە بيورەسۋرستار ماماندىقتارىن تاڭداعان. قالعان 25 ى پەداگوگيكالىق ماماندىقتار بويىنشا ءبىلىم الا باستادى.

سونىمەن بىرگە، الەۋمەتتىك از قامتىلعان وتباسىعا جاتاتىن 49 تۇلەك نۇر-سۇلتان قالاسى اكىمىنىڭ ارنايى گرانتىنا يە بولدى. ولاردىڭ اراسىندا جەتىمدەر، بالالار ءۇيىنىڭ تۇلەكتەرى، مۇگەدەك جانە اتا-انانىڭ قامقورلىعىنسىز قالعان، كوپبالالى وتباسىلاردىڭ بالالارى بار.