اياقپەن جازىلعان سالەم حات: قىتايلىق قانداسىمىزدىڭ حاتى كوزگە جاس ءۇيىردى

نۇر- سۇلتان. قازاقپارات - قوعام قايراتكەرى، فيلولوگيا عىلىمىنىڭ دوكتورى، پروفەسسور مىرزاتاي جولداسبەكوۆ قىتايدا تۇراتىن قىرعىز جانە قازاقتارمەن حات الىسىپ تۇراتىنىن ايتتى، دەپ حابارلايدى قازاقپارات ءتىلشىسى.

«مەن قىتايدا تۇراتىن قازاقتار جانە قىرعىزدارمەن حات جازىسىپ، بايلانىسىپ تۇرامىن. سول جەردە ءجۇسىپ دەگەن اعامىز بولدى. بىلتىر 97 جاسىندا قايتىس بولدى. ەلگە اكەلگىم كەلىپ جۇرگەن، وكىنىشكە قاراي دۇنيەدەن وزىپ كەتتى. ول كىسى قىتايدا «باس ماداقشى» دەپ اتالىپ جانە ول قىزمەتى ءۇشىن جالاقى الاتىن. قازىرگى كۇنى ول كىسىنىڭ جانىبەك دەگەن جاس شاكىرتى بار. ونىڭ ەكى قولى جوق، ماعان حات جازعاندا «اياقپەن جازىلعان سالەمحات» دەپ باستاپ جازادى. كوزىڭە ەرىكسىز جاس الاسىڭ. جازعاندا دا مولدىرەتىپ تۇرىپ، مارجانداي قىلىپ جازادى» ، - دەدى قوعام قايراتكەرى مىرزاتاي جولداسبەكوۆ ۇلتتىق مۋزەيدە وتكەن «گەوگرافيا - مادەني دامۋ باعىتى» اتتى كورمەنىڭ اشىلۋىندا سويلەگەن سوزىندە.

 ايتا كەتسەك، ۇلتتىق مۋزەيدە «گەوگرافيا - مادەني دامۋ باعىتى» اتتى كورمە اشىلدى. وعان قوستانايلىق اعايىندى اڭقاۋوۆتاردىڭ جۇننەن جاسالعان كارتينالارى قويىلعان. كورمەنى ەلوردالىقتار 30 - قىركۇيەككە دەيىن تاماشالاي الادى.