التى نەسيەسى بار: ەلوردا اكىمدىگى بۇگىن كوپىردەن سەكىرمەك بولعان ازامات تۋرالى ايتتى

نۇر-سۇلتان. قازاقپارات - ەلوردا اكىمدىگى «ارقار» كوپىرىنەن سەكىرمەك بولعان ەر ادامعا قاتىستى اقپارات بەردى، دەپ حابارلايدى قازاقپارات ءتىلشىسى.

«1991 -جىلى دۇنيەگە كەلگەن نۇر-سۇلتان قالاسىنىڭ تۇرعىنى رۇستەم ەرەجەپوۆ ەسىمدى ازامات كوپىردەن سەكىرمەك بولعان. وتباسىلى، 2 بالاسى بار. دەنى ساۋ، ەشقانداي قۇقىققورعاۋ ورگاندارى مەن مەديتسينالىق مەكەمەلەردە تىركەۋدە تۇرمايدى. اتالعان ازاماتتىڭ تۇراقتى جۇمىسى بولعان، كەيىن شىعىپ كەتكەن. بۇعان دەيىن قالالىق اكىمدىككە 2-3 رەت ءوز وتىنىشتەرىمەن جۇگىندى. اتاپ ايتقاندا، تۇرعىن ءۇي جانە جەر الۋ ماسەلەلەرى بويىنشا. اكىمدىك ءوز تاراپىنان دەمەۋشىلەردىڭ كومەگى ارقىلى ونىڭ سۇراقتارىن شەشكەن بولاتىن. سوڭعى رەت 9 -قىركۇيەك كۇنى ازامات اكىمدىككە كەلگەندە «ەڭبەك» باعدارلاماسى ارقىلى سولتۇستىك قازاقستان وبلىسىنا كوشۋ تۋرالى كەلىسسوز جۇرگىزىلدى. ياعني، وندا ەرەجەپوۆتىڭ تۇرعىن ءۇي جانە جۇمىس ماسەلەسىن شەشۋ دە قاراستىرىلعان»، - دەدى نۇر-سۇلتان قالاسى قوعامدىق دامۋ ىستەرى باسقارماسىنىڭ باسشىسى تالعات راحمانبەردى.

سونداي-اق، قالالىق اكىمدىك وكىلىنىڭ ايتۋىنشا، اتالعان ازاماتتىڭ 1 ميلليون 300 مىڭ تەڭگە كولەمىندە 6 نەسيەسى بار.

«ءبىز بۇل ازاماتپەن «ەڭبەك» باعدارلاماسى اياسىندا بارلىق سۇراقتاردى شەشىپ، تەك قۇجاتتاردى رەتتەۋ عانا قالعان. دەگەنمەن، بۇگىنگى كۇنگە دەيىن ءتيىستى قۇجاتتاردى تاپسىرمادى. ال بۇگىن كوپىردەن سەكىرەمىن دەپ دۇرلىكتىردى. قازىرگى ۋاقىتتا ازامات ەرەجەپوۆپەن قۇقىققورعاۋ ورگاندارىنىڭ ماماندارى جۇمىس ىستەپ جاتىر. ول ناتيجەسى تۋرالى قوسىمشا حابارلاناتىن بولادى»، - دەدى ول.

ايتا كەتسەك، اتالعان ازامات بۇگىن ءتۇس ۋاقىتىندا سارايشىق كوشەسىنىڭ بويىندا ورنالاسقان «ارقار» كوپىرىنەن سەكىرۋگە ارەكەت جاساعان ەدى.

اۆتور: ءالي يبرايەۆ