ساۋدا جانە ينتەگراتسيا مينيسترلىگى الدىندا قانداي مىندەتتەر تۇر
بۇل تۋرالى ۇكىمەت ۇيىندە وتكەن باسپا ءسوز ءماسليحاتىندا ق ر ساۋدا جانە ينتەگراتسيا ءمينيسترى باقىت سۇلتانوۆ ايتتى، دەپ حابارلايدى قازاقپارات ءتىلشىسى.
«پرەزيدەنت قاسىم- جومارت توقايەۆ سايلاۋ الدىنداعى تۇعىرناماسىندا جانە جاقىندا ءوزىنىڭ حالىققا ارناعان جولداۋىندا دا ءبىزدىڭ تاۋارىمىزدى سىرتقى نارىقتارعا ىلگەرىلەتۋگە اسا نازار اۋداردى. ساۋدا سوعىسى داۋىرىندە ءبىز ەكسپورتتاعى پوزيتسيامىزدى ساقتاپ قالۋعا عانا ەمەس، سونداي- اق قازاقستاندىق ءونىمنىڭ باسقا ەلدەرگە وتكىزىلۋىن كەڭەيتۋگە ءتيىستىمىز. بۇل رەتتە، ەكسپورت قۇرىلىمىن شيكىزات تاۋارلارىنان وڭدەلگەن ونىمدەرگە قاراي وزگەرتۋ جونىندە الدىمىزدا ماڭىزدى مىندەت تۇر» ، - دەپ توقتالدى مينيستر ۇكىمەت ۇيىندە وتكەن باسپا ءسوز ءماسليحاتىندا.
ونىڭ سوزىنە قاراعاندا، قازىر كەزدە ۇكىمەت ەكسپورتتى دامىتۋعا باعىتتالعان بارلىق باعدارلامالاردى، ياعني يندۋستريالىق- يننوۆاتسيالىق دامۋ، بيزنەستىڭ جول كارتاسىن، كاسىپكەرلىكتى قولداۋدىڭ ءارتۇرلى باعدارلامالارىن ۇيلەستىرۋ بويىنشا جۇمىس ىستەۋدە.
«جۋىردا شيكىزاتتىق ەمەس تاۋارلار مەن كورسەتىلەتىن قىزمەتتەردىڭ ەكسپورتىن ىلگەرىلەتۋ جونىندەگى جول كارتاسى بەكىتىلدى. قۇجاتتا تاۋاردىڭ شەتەل نارىقتارىنا شىعارۋ كەزىندە تۋىندايتىن كەدەرگىلەردى تومەندەتۋگە ەرەكشە نازار اۋدارىلعان. ءبىز ەكسپورتتالعان وڭدەلگەن تاۋارلار جەلىسىن كەڭەيتەمىز، سونداي- اق ەكسپورتتاۋشىلاردى قولداۋدىڭ قارجى جانە قارجى ەمەس شارالارىن كۇشەيتەمىز. جول كارتاسىنىڭ اياسىندا ماشينا جاساۋ سالاسىندا شاعىن جانە ورتا بيزنەسكە ەڭ تومەنگى ستاۆكامەن نەسيە بەرۋدى، وڭدەۋشى ونەركاسىپتىڭ ءىرى كاسىپورىندارىنا نەسيە ستاۆكالارىن سۋبسيديالاۋدى، ءۇشىنشى ەلدەردە قويمالاردى ۇيىمداستىرۋدى جوسپارلاۋدامىز. شەت ەلدەرمەن بىرگە قۇرىلىس قىزمەتتەرىنىڭ ستاندارتتارى مەن تەحنيكالىق تالاپتارىن ءوزارا تانۋدى كوزدەپ وتىرمىز» ، - دەدى ب. سۇلتانوۆ.
