رەسەي استاناسىندا قازاقستاننىڭ ەڭ ۇزدىك دەگەن فيلمدەرى ۇسىنىلادى

نۇر-سۇلتان. قازاقپارات - قازاقستاننىڭ رەسەيدەگى مادەنيەت كۇندەرى اياسىندا ماسكەۋ جۇرتشىلىعىنا، اتاقتى ترەتياكوۆ گالەرەياسىندا قازاق كينوسىنىڭ ءىنجۋ-مارجاندارى كورسەتىلەدى، دەپ حابارلايدى مادەنيەت جانە سپورت مينيسترلىگىنىڭ باسپا ءسوز قىزمەتى.

8- قىركۇيەكتە ساعات 16:00 دە قوناقتاردى «قازاق حاندىعى. التىن تاق» فيلمىنىڭ رەجيسسەرى رۇستەم ابدىراشيەۆ قارسى الادى.

سالتاناتتى اشىلۋدان سوڭ كورەرمەندەر اراسىندا تانىمال بولعان «قازاق حاندىعى. التىن تاق» فيلمى كينوونەرىن باعالاۋشىلاردىڭ وتىنىشتەرى بويىنشا ماسكەۋ تۇرعىندارى مەن قوناقتارىنا قايتا ۇسىنىلادى.

تاريحي فيلم ساعات 16:30 دا باستالادى. سول كۇنى ساعات 19:00 دە ترەتياكوۆ گالەرەياسى، ينجەنەرلىك كورپۋسىنىڭ كينوزالىندا رەجيسسەر دجەفف ۆەسپانىڭ «امىرە» فيلمىنىڭ پرەمەراسى وتەدى.

«يلليۋزيون» كينوتەاترى كينومارافوندى جالعاستىرادى. 9- قىركۇيەكتە ساعات 17:00 دە سوناۋ وتكەن عاسىردا، 1954-جىلى جارىققا شىققان «ماحاببات تۋرالى پوەما» فيلمىنىڭ كورسەتىلىمى بولادى.

كارتينانىڭ رەجيسسەرلەرى شاكەن ايمانوۆ پەن كارل گاككەل. شاكەن ايمانوۆتىڭ «الداركوسە» فيلمىنىڭ كورسەتىلىمى 10- قىركۇيەكتە ساعات 17:30 دا باستالادى. كينوماروفوندى 11- قىركۇيەك كۇنى ساعات 19:00 دە رەجيسسەر اندرەي شالوپ پەن كيم درۋجينيننىڭ «28- پانفيلوۆشى» كارتيناسى قورىتىندىلايدى. بارلىق كورسەتىلىمدەرگە كىرۋ تەگىن.