قاسىم-جومارت توقايەۆ: مەملەكەت ءوز ازاماتتارىن تىڭداۋى كەرەك
«مەملەكەت ءوز ازاماتتارىن تىڭداي ءبىلۋى ءتيىس. ەڭ باستىسى تىڭداۋى كەرەك. ءبىز مەملەكەتتىڭ الەۋمەتتىك ساياساتىن قايتا قاراۋىمىز كەرەك. ۇلتتىق ەكونوميكا - ءبىزدىڭ قازاقستاندىقتاردىڭ ءال-اۋقاتىنا نەگىزدەلۋى ءتيىس. باسقاشا ايتقاندا، مەملەكەت تابىسىن بولۋدە ادىلدىكتى كۇشەيتۋگە ءتيىسپىز. ءبىراق، ماسىلدىق پيعىلدىڭ ورىن الۋىنا جول بەرىلمەيدى. وكىنىشكە قاراي، بۇل كەسەل ۇلتتىق مىنەز-قۇلقىمىزعا كەرى اسەرىن تيگىزۋدە. ءبىز بۇكىل قوعام بولىپ، جۇرتشىلىقتى ەڭبەككە باۋلۋعا ءتيىسپىز. تابىستى جۇمىس ىستەگەنى ءۇشىن ازاماتتاردى قارجىلاي ىنتالاندىرۋ كەرەك. بۇل - مەملەكەتتىڭ مىندەتى. ءبىز وسى مىندەتتەردى ورىنداۋىمىز كەرەك»، - دەدى مەملەكەت باسشىسى ەلوردادا ءوتىپ جاتقان ۇلتتىق قوعامدىق سەنىم كەڭەسىنىڭ العاشقى وتىرىسىندا.
ەسكە سالا كەتسەك، ەلورداداعى تاۋەلسىزدىك سارايىندا قازاقستان پرەزيدەنتى قاسىم-جومارت توقايەۆتىڭ توراعالىعىمەن ۇلتتىق قوعامدىق سەنىم كەڭەسىنىڭ العاشقى وتىرىسى ءوتىپ جاتىر.
«قازاقستان پرەزيدەنتتىك باسقارۋ فورماسىنداعى مەملەكەت رەتىندە قالۋى كەرەكتىگىنە سەنىمدىمىن. الايدا پارلامەنت ساياسي جۇيەدەگى لايىقتى ورنىن الۋى قاجەت»، - دەدى جيىندا پرەزيدەنت. سونداي- اق، مەملەكەت باسشىسى قازاقستاندا ساياسي رەفورمالار قاجەتتىلىگى ءپىسىپ-جەتىلگەنىن ءمالىم ەتتى.
اۆتور: ايان بەكەن ۇلى
