قاراعاندىداعى اتىشۋلى جاپپاي توبەلەس: الدىن الا سوت وتىرىسى ءوتتى

قاراعاندى. قازاقپارات -  قاراعاندىدا «ەجەلگى ريم» مەيمانحاناسىنىڭ جانىندا بولعان جاپپاي توبەلەسكە قاتىستى ءىس بويىنشا الدىن الا سوت وتىرىسى ءوتتى.

ونىڭ بارىسىندا 13 ايىپتالۋشىنىڭ ءبىرى سۋدياعا تەرگەۋ شارالارى كەزىندە وزىنە كۇش كورسەتىلگەنىن جەتكىزدى، دەپ حابارلايدى قازاقپارات ءتىلشىسى.

الدىن الا سوت تىڭداۋى ا ك-159/1 مەكەمەسىندە ءوتتى. اتالمىش ءىس بويىنشا 13 ادامعا ايىپ تاعىلۋدا. ولاردىڭ 12 سى سەگىز اي بويى قاماۋدا وتىر. كۇدىكتىلەرگە ق ر ق ك-نىڭ 293-بابى 3-بولىگى («الدىن الا ءسوز بايلاسۋ ارقىلى ادامدار توبىمەن جاسالعان بۇزاقىلىق») بويىنشا كىنا تاعىلۋدا. ال سوتتالۋشىلاردىڭ ءبىرى -  يۋسيف نۋرۋل ادام ءولتىردى دەپ ايىپتالۋدا. كۇدىكتىلەردىڭ قاتارىندا، سونداي-اق ەلدەن قاشىپ ۇلگەرگەن نارەك گۋرۋريان بار. ول رەسەيدىڭ قۇقىققورعاۋ ورگاندارىنا ءوز ەركىمەن بەرىلدى. ءبىراق ادام ولتىرگەنىن مويىندامادى. جانە وسى كۇنگە دەيىن قازاقستانعا ەكستراديتسيالانعان جوق.

سوت وتىرىسى بارىسىندا وزگە ايىپتالۋشىلاردىڭ قورعاۋشىلارى بىرنەشە ءوتىنىمحات ءتۇسىردى. ادۆوكاتتار قىلمىستىق-ءىس جۇرگىزۋ كودەكسىنىڭ بۇزىلۋىنا بايلانىستى ءىستى پروكۋراتۋراعا قايتارۋدى، سوتتالۋشىلارعا اناعۇرلىم جەڭىلىرەك بۇلتارتپاۋ شاراسىن قولدانۋدى سۇرادى. سونداي-اق كۇدىكتىلەردىڭ ءبىرى - كاير نادىربەكوۆ تەرگەۋ ورگاندارى تاراپىنان وزىنە كۇش كورسەتىلگەنىن جانە ايعاق زاتتاردىڭ جالعاندىعىنا شاعىمداندى.

بەلگىلى بولعانداي، قاراعاندى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى ءشارىپ سەيسەمبايەۆ ءوتىنىمحاتتاردى قاراپ، ولار بويىنشا شەشىمدى 6 -قىركۇيەك كۇنى جاريالايدى.

ەسكە سالايىق، 2019 -جىلدىڭ 1 -قاڭتارىنا قاراعان ءتۇنى قاراعاندىداعى «ەجەلگى ريم» مەيمانحاناسىندا جانجال بولىپ، ونىڭ سوڭى جاپپاي توبەلەسكە ۇلاستى. سالدارىنان ءبىر ادام كوز جۇمدى، تاعى ۇشەۋى پىشاق جاراقاتتارىن الدى. قۇقىققورعاۋ ورگاندارى ق ر قىلمىستىق كودەكسىنىڭ 99 («ادام ءولتىرۋ») جانە 293 («بۇزاقىلىق») باپتارى بويىنشا قىلمىستىق ىستەر قوزعادى.

اۋدارما: ميرا تولەندى قىزى