اقىن ءارى ءانشى ماقپال جۇماباي لوندوندا جەكە كونسەرتىن وتكىزەدى
الداعى 18 -قىركۇيەككە جوسپارلانعان شىعارماشىلىق كەشى تۋرالى قازاقپارات تىلشىسىنە ءانشىنىڭ ءوزى ايتىپ بەردى.
«بۇل جوباعا دايىندالعانىما تۋرا ءبىر جىل بولدى. جۋىردا 15 ادام لوندونعا اتتانعالى وتىرمىز. زاماناۋي قازاق ونەرى ءۇشىن تاۋەكەلگە بەل بايلادىق. ءبىرشاما ۋاقىت بۇرىن ءبىلىمىم مەن تاجىريبەمدى زاماناۋي ونەرىمىزدى دامىتۋ جولىنا ارنايتىنىمدى، سول جولدا ناقتى ىستەر باستاعانىمدى جاريالاعان ەدىم. بۇل لوندون ساپارى - سول ناقتى ءىسىمنىڭ، تاۋەكەلىمنىڭ ءبىرى. 18 -قىركۇيەك لوندونداعى برۋنەل كەڭىستىگىندە (مۋزەيىندە) АUA كونسەپتۋالدى كونسەرتىم وتەدى. كونسەرتتى يندۋستريالدىق رەۆوليۋتسيانىڭ تۇلعالارى مارك جانە يزامبارد برۋنەلدەر 1842 -جىلى سالعان وسى تاريحي عيماراتتا وتكىزگىم كەلدى»، - دەدى ءانشى م. جۇماباي.
مۋزىكانتتىڭ ايتۋىنشا، كونسەرتتە ايتىلاتىن بارلىق جىرلار كاسىبي دەڭگەيدە اعىلشىن تىلىنە اۋدارىلعان.
«كونسەرتپەن قاتار، لوندوندا «Maqpalsher» اتتى انيماتسيالىق قىسقا مەترلى فيلمىمىزدى كورسەتەمىز. كەشتە ايتىلاتىن بارلىق جىرلاردى كاسىبي اۋدارماشى اعىلشىن تىلىنە اۋداردى. اۋدارما كورسەتىلەدى ءارى قوناقتارعا كىتاپشا رەتىندە تارتۋ ەتىلەدى. كۇنى كەشە عانا ۇيىمداستىرۋ جۇمىستارىنىڭ بارلىق كەزەڭىنە نۇكتە قويدىق»، - دەدى ول.
اقىن اعىلشىن ەلىندەگى ءوز شىعارماشىلىق كەشىن قازاق ونەرىنىڭ شەتەلگە شىعۋى، تانىلۋى دەپ سانايدى.
«ارينە، لوندوندا كونسەرت بەرۋ الەمدىك جاڭاشىلدىق ەمەس، دەگەنمەن مەن ءۇشىن، مەنىڭ شىعارماشىلىعىم ءۇشىن ماڭىزدى. ءان كەشىمدە بارلىعى 12 اۆتورلىق جىر ورىندالادى. جىرلارىم ارقىلى اعىلشىن تىڭدارماندارىنا قازاق حالقىنىڭ دۇنيەتانىمى مەن ادامنىڭ ىشكى سەزىمىن جەتكىزگىم كەلەدى. مەنىڭ شىعارمالارىمدا ءومىر، ادامي قۇندىلىقتار مەن ەلەنە بەرمەيتىن نازىك سەزىمدەر باياندالادى. ءبىر جاعىنان ءبىز ءۇشىن سىن بولايىن دەپ تۇر، سەبەبى بىزدىكى ستاندارتتى ەمەس، جاڭا مۋزىكالىق باعىت. تاعى ءبىر ايتىپ وتەتىن جايت، كونسەرت - كوممەرتسيالىق ەمەس، مادەنيەتكە، ونەرگە ارنالعان جوبا، سوندىقتان ول تەگىن وتەدى»، - دەيدى ونەر يەسى.
ءانشى ءمالىم ەتكەندەي، كونسەرت جاندى داۋىستا وتەدى جانە وعان شامامەن 120-150 كورەرمەن كەلەدى دەپ كۇتىلۋدە.
اۆتور: ءالي يبرايەۆ
