پرەزيدەنت جولداۋى: «ەير استانا» بيلەت باعاسى قايتكەندە ارزاندايتىنىن ايتتى

بۇل تۋرالى قازاقپارات «ەير استانا» كومپانياسىنىڭ كورپوراتيۆتىك كوممۋنيكاتسيالار جونىندەگى دەپارتامەنتىنە سىلتەمە جاساپ حابارلايدى.

«ق ر پرەزيدەنتىنىڭ جولداۋىنا سايكەس، اۋە تاسىمالىن قولجەتىمدى ەتۋ ءۇشىن «ەير استانا» كومپانياسى FlyArystan جوباسىن جەتىلدىرە تۇسپەك. ول ءۇشىن جىل سوڭىنا دەيىن تاعى ەكى Airbus A320 لاينەرىن ساتىپ الامىز. ناتيجەسىندە رەيستەردىڭ سانى كۇنىنە ەكى ەسەگە ارتادى. 2020 -جىلدىڭ سوڭىنا قاراي FlyArystan ۇشاقتارىنىڭ سانىن 10 عا جەتكىزۋ كوزدەلگەن. سونىڭ ارقاسىندا كۇندەلىكتى رەيستەردىڭ سانى 72 گە جەتەدى. ياعني، قازاقستان ىشىندە ۇشۋ كەستەسى ەداۋىر كەڭەيتىلەدى. ياعني، وڭىرلەر اراسىندا اۋە قاتىناسى داميدى»، - دەلىنگەن كومپانيا ۇسىنعان اقپاراتتا.

كورپوراتيۆتىك كوممۋنيكاتسيالار جونىندەگى دەپارتامەنت ماماندارى سۇرانىسى جوعارى باعىتتار بويىنشا بيلەتتەردىڭ قۇنى ەۋروپاعا قاراعاندا 30 پايىزعا قىمبات بولۋىنىڭ سەبەبىن دە تۇسىندىرگەن.

«الەمدەگى بارلىق اۋە كومپانيالارى كەروسين مەن ينجەنەرلىك-تەحنيكالىق قىزمەت كورسەتۋدىڭ، تەحنيكا مەن قوسالقى بولشەكتەردىڭ، اۋەجايداعى مامان دايارلاۋ ستاندارتتارىنىڭ قۇنىنان شىعىن شەگەدى. بۇل رەتتە باتىس تەحنيكاسىن پايدالاناتىن قازاقستان اۋە كومپانيالارى شەتەلدىك باسەكەلەستەرى سياقتى اتالمىش شىعىنداردى شەتەلدىك ۆاليۋتامەن تولەيدى»، - دەلىنگەن مالىمەتتە.

«ەير استانا» اۋە تاسىمالىنداعى قازىرگى باعانى ءتۇسىرۋ ءۇشىن قابىلدانۋى ءتيىس شارالاردى دا اتادى.

«اۋە تاسىمالىنىڭ قۇنىن ءتۇسىرۋ ءۇشىن الدىمەن قازاقستان اۋەجايلارىندا تاريفتى كورسەتىلەتىن قىزمەتتەردىڭ ارتۋىنا قاراي ءتۇسىرۋ قاجەت. ال جولاۋشى اعىنى باسەڭ وڭىرلەردە اۋەجاي شىعىنىنىڭ ءبىر بولىگى سۋبسيديالانۋى ءتيىس.

رەسەي تاجىريبەسىنە سۇيەنە وتىرىپ، ىشكى رەيستەرگە سالىناتىن قوسىمشا قۇن سالىعىن الىپ تاستاۋ قاجەت. بۇل بيلەت باعاسىن 12 پايىزعا ارزانداتادى. قوسىمشا قۇن سالىعىنىڭ الۋىنۋى رەسەيدە ءوڭىرارالىق رەيستەردى جيىلەتىپ، اۋماعىن كەڭەيتىپ وتىر»، - دەلىنگەن كومپانيانىڭ اقپاراتىندا.

اۆتور: ەسىمجان ناقتىباي