«ساباققا بارعىم كەلمەيدى»
ويىن بالاسىن «بولدى، جات، تاڭەرتەڭ تۇرا المايسىڭ» دەپ كۇشتەپ ۇيىقتاتا المايسىز.
نە ىستەۋ كەرەك؟
«ساباقتا ابدەن قينالاتىن بولاسىڭ، اعزاڭدى سوعان دايىندا» دەپ جەتكىلىكتى ءتۇسىندىرىڭىز. كوز الدىنا سيتۋاتسيانى سۋرەتتەڭىز. ويىنشىق، گادجەت، كوشە ويىندارىمەن ەمەس، وزىڭىزبەن عانا ءتىل تابىستىرۋعا تىرىسىڭىز. گادجەت، ويىنشىق ونىڭ ميىن ودان سايىن «وياتا» بەرەتىن بولادى، ال كوشە ويىندارى ۇيقى گورمونىن تەجەيدى. ودان دا جاتار الدىندا كىتاپ وقىپ نەمەسە بىرگە ەرتەگى قۇراستىرىڭىز.
«وقۋشى مەن مۇعالىم» ويىنىن ويناۋ
جۇمساق ويىنشىقتار مەن بالانى قاتار وتىرعىزىپ، تاقتا جاساپ ءداستۇرلى ساباق ءوتۋ ˗ پسيحولوگيانى «شارشاتۋ» . «مەكتەپتە ەسىڭە تۇسەتىن بولادى»، «الا جازداي ويناپ، ءبارىن ۇمىتىپ قالىپسىڭ» دەپ سوگە كورمەڭىز.
نە ىستەۋ كەرەك؟
بارلىق جەردى قىزىقتى ويىنعا اينالدىرىپ كورىڭىز. دۇكەنگە بارار جولعا دەيىنگى اعاشتاردى ساناپ، جاڭىلتپاش جاتتاپ، جۇمباق جاسىرىپ، لوگيكالىق ەسەپتەر شەشىپ، بالانى قىزىقتىرۋعا بولادى. زەيىندى ارتتىرۋ ءۇشىن «جوعالعان زات» ويىنىن ۇسىنامىز. ويىندا ۇستەلدىڭ ۇستىنە بىرنەشە زات قويىلادى. بالا ولارعا مۇقيات قاراپ العان سوڭ، تەرىس قاراپ تۇرادى. ۇستەلدەن ءبىر زات الىپ تاستالىنادى. وقۋشى قاي زاتتىڭ جوعالىپ كەتكەنىن تابۋ كەرەك. زاتتاردىڭ سانىن اقىرىنداپ وسىرۋگە بولادى.
وقۋ قۇرالدارىن بىرگە تاڭداۋ
جاڭا وقۋ جىلىنا قۇرالدارىن سايلاپ، سومكەسىن ارقالاپ كەتەتىن وقۋشى (اسىرەسە، تومەنگى سىنىپ) زاتتارىن سىنىپتاستارىنىڭ داپتەرلەرىمەن سالىستىرعىسى كەلەدى. وزىنە ەڭ ادەمى، ءوز «تەمالارىنا» ساي سۋرەتتەرى بار داپتەر ساتىپ الۋدى ويلايدى. ال اتا- انانىڭ ويى - كوتەرمە باعامەن ءبىر- اق كوتەرىپ الىپ كەتۋ. ەكى پىكىردىڭ توعىسپاۋى وسى جەردەن باستالادى.
نە ىستەۋ كەرەك؟
بارلىعى ەمەس، تەك 1-2 عانا داپتەرىن وزىنە تاڭداتىپ، قالعانىن قاراپايىم ەتىپ الىڭىز. پەنال، سومكە، ءتۇرلى ءتۇستى قاعاز، بەينەلەۋ داپتەرى سىندى دۇنيەلەردى دە وزىنە تاڭداتىڭىز. بۇل ونىڭ ءسال دە بولسا ساباققا دەگەن قىزىعۋشىلىعىن تانىتادى. «ەگەر وسى داپتەردىڭ ءىشىن 5-كە تولتىرساڭ، بۇل داپتەر ودان ادەمى بولا تۇسەتىن بولادى» دەپ تە ايتىپ قويىڭىز.
جازبەن قوشتاسىپ، كۇزدى قارسى الۋ
كەي بالا وقۋ جىلىن كۇزبەن بايلانىستىرىپ، بۇل ماۋسىمدى ۇناتپاۋى دا مۇمكىن. ءسىز جۇمىسقا اسىققاندا، ول ۇيقىسىنان تۇرعىسى كەلمەي، ساباققا بارعىسى كەلمەيتىنىن، ءالى دە قىدىرىپ دەمالعىسى كەلەتىنىن ايتۋى دا عاجاپ ەمەس. نە ىستەۋ كەرەك؟ دەمالىس كەزىندە تۇسكەن جەكە، وتباسىلىق سۋرەتتەردى بولمەسىنە بالاڭىزبەن بىرگە ءىلىڭىز، جاي عانا ءىلىپ ەمەس، «بۇل 2019 -جىلدىڭ جاز ماۋسىمىنداعى ----نىڭ (بالاڭىزدىڭ ەسىمى) كەرەمەت شاعى، وسى كەزدەگى بار ەنەرگياسىن ەندى كۇزدە ساباققا ارنايدى، سولاي ما، بالام؟» دەپ كەرى بايلانىس ورناتىڭىز. ادەمى ەستەلىكتەردى ەسكە الىپ، سوڭعى رەت «جازعى» كوككە شىعىڭىزدار. سارعىش تارتقان جاپىراقتار مەن بۇرشىكتەردى جيناپ، ءۇيدى «كۇزگە» دايىنداڭىزدار، ابايدىڭ «سۇر بۇلت، ءتۇسى سۋىق قاپتايدى اسپان» ولەڭىن ەسىنە ءتۇسىرىپ قويىڭىز. وسىلايشا ءسىز ونى پسيحولوگيالىق تۇرعىدا بۇل ماۋسىمعا دايىندايسىز.
ۇيىرمەلەر تاڭداۋ
ەگەر بالاڭىزعا ءالى ۇيىرمەلەر تاڭدالماعان بولسا، ازىردەن كىرىسىڭىز. ءتىپتى جاز ورتاسىنان باستاپ ىزدەسەڭىز دە بولاتىن ەدى. «ساباق ابدەن باستالعان سوڭ، كورەمىز» دەۋ - بەكەر.
نە ىستەۋ كەرەك؟
بالامەن اقىلداسىپ، قىزىعۋشىلىعىن سارالاپ، ءوزى قالاعان سەكسيا، ۇيىرمەلەرگە اپارىپ كورىڭىز. ۇناسا، بىرتىندەپ، تاڭداپ، كۇندەلىكتى رەجيمىن قۇراستىرىڭىز.
7.00 - تاڭعى اس
8.00 - مەكتەپكە بارادى
13.00 - مەكتەپتەن شىعادى
14.30 - اعىلشىن
15.40 - ءجۇزۋ
بۇل جاي عانا مىسال، ءسىز بۇنى قازىردەن دايىنداپ قويىڭىز.
بولمەسىن «ساباققا» دايىنداۋ
جاز بويى بەتى اشىلماعان كىتاپتاردى سورەگە جيناپ، كەرەك ەمەس قاعازداردى تاستاپ، ويىنشىقتاردى ءبىر بۇرىشقا جيناپ، جاڭا وقۋ قۇرالدارىن ءتىزىپ، كىتاپتارىن قاپتاپ، كۇندەلىگىن تولتىرۋ - ءبىراز جۇمىس. ءبىراق مۇنىڭ ءبارىن ءوزىڭىز عانا جاساۋشى بولماڭىز. بالانىڭ قىزىعۋشىلىعىن وياتاتىنداي ەتىپ ديالوگ قۇرىڭىز. «سەن ساباققا كەتكەندە، مىنا «ترانسفورمەر» قايدا تۇراتىن بولادى؟ « دەگەن سياقتى «بالا قيالىمەن» سويلەسىڭىز. تۇسىنگەنىڭىزدەي، بالانى مەكتەپكە دايىنداۋ دەگەن تەك وقۋ قۇرالدارىن الىپ بەرۋمەن شەكتەلمەيدى. الدىن الا ءسىز دە پسيحولوگيالىق تۇرعىدا دايىن بولۋىڭىز كەرەك. قىزىقتى ديالوگ، ەرەكشە قارىم- قاتىناس جانە ماحاببات. وسى ءۇش بىرلىكتى ۇمىتپاڭىز!
Massaget.kz
