قازاقستاندا ەندى كوپقاباتتى تۇرعىن ۇيلەردى ءتورت ايدىڭ ىشىندە تۇرعىزۋعا بولادى

ۇكىمەت باسشىسى اسقار مامين ەلورداداعى ModeX زاۋىتىنىڭ قۇرىلىسىمەن تانىستى.

پرەمەر- ءمينيستردىڭ رەسمي سايتىنىڭ مالىمەتىنشە، سالىنىپ جاتقان جاڭا زاۋىت استاناداعى «استانا - جاڭا قالا» ا ە ا №1 يندۋستريالىق پاركىنىڭ اۋماعىندا ورنالاسقان.

مودۋلدى ءۇي قۇرىلىسى - گەرمانيا، سينگاپۋر، قىتاي سىندى ەلدەردە قولدانىلاتىن تۇرعىن ءۇي سالۋدىڭ زاماناۋي وزىق تەحنولوگياسى. ول عيماراتتاردى تەز، ساپالى سالۋعا مۇمكىندىك بەرەدى. ماسەلەن، تازا ارلەنگەن 16 قاباتتى ءبىر كىرەبەرىستى تۇرعىن ءۇي ادەتتە 12-18 اي سالىنسا، بۇل تەحنولوگيامەن ءۇيدى نەبارى 4 ايدىڭ ىشىندە تۇرعىزۋعا بولادى. مۇنداي ناتيجەگە مودۋلدىك بلوكتاردىڭ ياعني دايىن بولمەلەردىڭ ارقاسىندا قول جەتكىزىلەدى. ولار كونسترۋكتور بولشەكتەرى ءتارىزدى ءبىرتۇتاس بولىپ جيناقتالادى.

«قۇرىلىس سەكتورى - قازاقستان ەكونوميكاسىنىڭ ەڭ سەرپىندى دامىپ كەلە جاتقان سالاسى، ءوسىمى %11,5 قۇرايدى. بۇل جوبا حالىقتىڭ تۇرعىن ۇيگە قولجەتىمدىلىگىن ارتتىرىپ قانا قويماي، قۇرىلىس يندۋسترياسىنىڭ دامۋىنا سەرپىن بەرەدى»، - دەدى قازاقستان پرەمەر-ءمينيسترى زاۋىت قىزمەتكەرلەرىنىڭ الدىندا سويلەگەن سوزىندە.

ۇكىمەت باسشىسى باسپا ءسوز قىزمەتىنىڭ مالىمەتىنە سايكەس، زاۋىت 700 دەن استام جۇمىس ورنىن قۇرۋعا جول اشىپ، جىلىنا 405 مىڭ شارشى مەتر تۇرعىن ءۇي سالۋعا مۇمكىندىك بەرەدى.

زاۋىتتىڭ ءبىرىنشى كەزەڭى وسى جىلدىڭ 1 -جەلتوقسانىنا دەيىن، ال ەكىنشى كەزەڭى - 2020 -جىلى، ءۇشىنشى كەزەڭى 2021 -جىلى پايدالانۋعا بەرۋ جوسپارلانعان.

كاسىپورىندا جۇمىس ىستەيتىن ماماندار ءۇشىن دۋالدى ءبىلىم بەرۋ جۇيەسى قاراستىرىلىپ وتىر.