ق ر قورعانىس ءمينيسترى قوسشىدا پاتريوتتىق ساباق وتكىزدى
اقمولا وبلىسى. قازاقپارات – ق ر قورعانىس ءمينيسترى نۇرلان ەرمەكبايەۆ ەلوردانىڭ ىرگەسىندەگى قوسشى اۋىلىنداعى 2№ ورتا مەكتەپكە بارىپ، ءبىلىم كۇنىنە وراي «سانالى ۇرپاق-جارقىن بولاشاق» اتتى ءبىرىنشى پاتريوتتىق ساباق وتكىزدى.
بۇل تۋرالى قازاقپارات ح ا ا قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.
ساباق بارىسىندا نۇرلان ەرمەكبايەۆ وقۋشىلارعا قازاقستاننىڭ قازىرگى زامانعى ارمياسى، ونىڭ قۇرىلىمى مەن مىندەتتەرى تۋرالى ايتىپ بەردى. وقۋشىلار اسكەريلەردىڭ تەحنيكالىق جابدىقتالۋى جانە 21- عاسىردىڭ اسكەري قىزمەتشىلەرگە قويىلاتىن تالاپتارى تۋرالى سۇراقتار قويدى.
«ەسەيگەندە كەيبىرەۋلەرىڭىز وتان قورعاۋشى ماماندىعىن تاڭداپ، قازاقستان رەسپۋبليكاسىنىڭ قارۋلى كۇشتەرى قاتارىنا تۇسۋلەرىڭىز مۇمكىن. وتاندى قورعاۋ ءارقاشان جوعارى ازاماتتىق ەرلىك دەپ سانالادى»، - دەدى نۇرلان ەرمەكبايەۆ.
بۇگىن قازاقستاننىڭ اسكەري وقۋ ورىندارىندا دا ساباق باستالدى. ەلدەگى 4 «جاس ۇلان» اسكەري مەكتەبى، كادەت كورپۋسى، قۇرلىق اسكەرلەرىنىڭ اسكەري ينستيتۋتى، راديوەلەكترونيكا جانە بايلانىس اسكەري ينستيتۋتى، ت. بەگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتى، تۇڭعىش پرەزيدەنت-ەلباسى اتىنداعى ۇلتتىق قورعانىس ۋنيۆەرسيتەتى ەل قورعايتىن ساربازدار دايىنداۋ ىسىنە جاڭا سەرپىنمەن كىرىستى.
