پاۆلودارلىق ونەرتاپقىش ارزان ءارى ساپالى بيونيكالىق پروتەز شىعاردى

پاۆلودار. قازاقپارات -  پاۆلودارلىق ستۋدەنت ەلدوس ءسابيت مۇگەدەك جاندارعا ارنالعان بيونيكالىق قول جوباسىن ويلاپ تاپتى.

بۇل نارىقتاعى بالاما پروتەزدەرمەن سالىستىرعاندا وتە ارزان، دەپ حابارلايدى قازاقپارات ءتىلشىسى. ەلدوس ءسابيت پاۆلودارداعى يننوۆاتسيالىق ەۋرازيا ۋنيۆەرسيتەتىندە ءبىلىم الىپ ءجۇر.

ول كوپتەن بەرى قول پروتەزىنىڭ تەحنيكاسى مەن تەحولوگياسىن زەرتتەپ، قازىرگى زاماناۋي تەحنولوگيالاردىڭ كومەگىمەن بارىنشا ىڭعايلى ءارى قولجەتىمدى پروتەزدى جاسادى. «مەن جاساپ شىعارعان پروتەز جوباسى كوپ جاعىنان ىڭعايلى دەپ ويلايمىن.

جالپى بيونيكالىق قولدىڭ ءار ساۋساعى قوزعالا الادى. ادام قولىنىڭ بۇلشىقەتتەرى جيىرىلعاندا، موتوردان باقىلاۋشىعا سيگنال بارادى، ناتيجەسىندە ساۋساقتار جۇدىرىققا جۇمىلادى نەمەسە اشادى. بۇل ازىرشە.. . كەيىن ونى تولىقتىرىپ، باسقا دا تابيعي ساۋساق قيمىلدارىن جاساي الاتىن فۋنكتسيالار قوساتىن بولامىن. ول باعىتتاردا ءالى جۇمىس ىستەيمىن»، - دەيدى ەلدوس. قۇرىلعى قالاي جۇمىس ىستەيدى؟

«مەن جاساپ شىعارعان قۇرىلعى جوباسى شەتەلدىك قىمبات پروتەزدەر سياقتى ەلەكتروميوگرافيانىڭ كومەگىمەن جۇمىس جاسايدى. ياعني، جاساندى تەتىك ادام دەنەسىنە جالعانادى، بۇلشىقەتتەر تارتىلعان كەزدە پروتەز ءتيىستى فۋنكسيالاردى اتقارادى. قۇرىلعى كومەگىمەن جاساندى قول جۇمىلادى جانە اشىلادى. پروتەز پلاستيكتەن جاسالىپ 3D- پرينتەرلەرىنەن باسىپ شىعارىلادى. قۇرىلعىعا سەرۆوپريۆود، پلاتا، ەلەكتروميوگرافيالىق تەتىك پەن اككۋمۋلياتور قولدانىلادى»، - دەيدى ونەرتاپقىش.

ستۋدەنتتىڭ نەگىزگى ارمانى قاراپايىم ادامدار ءۇشىن قولجەتىمدى ءارى ىڭعايلى پروتەز جاساپ شىعارۋ.

«ادەتتە دەنى ساۋ ادامدارعا قاراپايىم نارسەلەردى جاساۋ مۇمكىن بولماعان كەزدە مۇگەدەكتەرگە ءومىر ءسۇرۋ وڭاي ەمەس ەكەنىن ويلايسىڭ. ءبىز جاساپ جاتقان جوبا وسىعان ۇقسايتىن جوبالارعا قاراعاندا وتە ارزان. بۇل جوبانىڭ ەلىمىزدە بالاماسى بار. «Mbionics» كومپانياسى 2018 -جىلدان بەرى وسىنداي پروتەزدەردى شىعارىپ كەلەدى. الايدا ولاردىڭ باعاسى 1 ميلليون تەڭگەدەن باستالادى. ال بىزدەگى دايىن ءونىمنىڭ باعاسى 300 مىڭ تەڭگەدەن باستالماق. قارجىلاندىرۋ قالاي باستالادى، سولاي جوبانى ىسكە قوساتىن بولامىز»، - دەيدى ەلدوس.

ال قازاقستاندىق پروتەزدى شەتەلدىك ونىمدەرمەن سالىستىرساق باعاسى 10 ەسە ارزان. «ءبىز جاساعان ءونىم جوباسىن شەتەلمەن سالىستىرساق، ونىڭ ايىرماشىلىعى باعاسىندا عانا. ماسەلەن ءبىز جاساپ شىعاراتىن شەتەلدىك پروتەزدەر شامامەن 30 مىڭ دوللار تۇرادى. مەنىڭ باستى ماقساتىم -  قازاقستاندىقتار ءۇشىن قولجەتىمدى ارزان ءارى ساپالى پروتەز جاساۋ» - دەپ اتاپ ءوتتى ستۋدەنت.

وسى جەردە وقىرماندارعا تۇسىنىكتى بولۋ ءۇشىن ايتا كەتسەك، قازاقستاننىڭ «100 جاڭا ەسىمى» قاتىرىنا ەنگەن ماۋلەن بەكتۇرعانوۆ ەلىمىزدە العاش رەت بيونيكالىق پروتەزدى ويلاپ تاپقان جانە ول «Mbionics» كومپانياسىنىڭ نەگىزىن قالاعان. ەلدوس ءوزىنىڭ جوباسىن ءتۇرلى كورمەلەردە كورسەتىپ، كوپشىلىكتىڭ ىقىلاسىنا بولەنىپ ءجۇر. جاقىندا عانا پاۆلوداردا وتكەن IT- فورۋمدا، ونىڭ جۇمىسىن ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى اسقار جۇماعالييەۆ قاجەتتى ءارى زاماناۋي جوبا دەپ اتادى. جالپى ەلدوس ءوزىنىڭ جوباسىن پاۆلودارداعى وندىرىستە ىسكە قوسقىسى كەلەدى.

«ارينە، جوباعا شەتەلدىك ينۆەستورلار قىزىعۋشىلىق تانىتىپ وتىر، الايدا ولاردىڭ ءوز مۇددەلەرى باسىم. سوندىقتان ءبىز جوبانى قارجىلاندىراتىن شەتەلدىك ينۆەستورلاردى ىزدەپ جاتقانىمىز جوق. ءبىز مەملەكەت تاراپىنان گرانت الىپ، جوبانى ىسكە اسىرۋ جاعدايلارىن قاراستىرۋدامىز. ازىرگە جوباعا دەنساۋلىق ساقتاۋ مينيسترلىگى قىزىعۋشىلىق تانىتىپ، بالالار ءۇشىن پروتەز جاساي الاتىندىعىمىزدى سۇرادى. ءبىز جاساۋعا بولادى دەپ جاۋاپ بەردىك» - دەيدى ول.

ونىڭ ايتۋىنشا، بالالار ءۇشىن بيونيكالىق پروتەزدەن گورى، ەلەكتروندى پروتەز ىڭعايدى. ويتكەنى ەلەكتروندى پروتەزدىڭ مەحانيكاسى قاراپايىم، ەلەكترونيكاسىز جانە ول بارىنشا ارزان ەكەن.

اۆتور: گۇلسايا جاقان