جامبىلدا «جالعان قالىڭدىق» قولعا ءتۇستى

تاراز. قازاقپارات - جامبىلدىق پوليتسەيلەر بىرنەشە رەت جالعان نەكە قيىپ، الاياقتىقپەن اينالىسىپ كەلگەن ايگۇل نيازوۆانى قولعا ءتۇسىردى، - دەپ حابارلايدى قازاقپارات.

جالعىز باستى ەر ازاماتتارمەن نەكەگە وتىرىپ، ونىڭ تۋىستارىن ءوزىنىڭ الاياقتىق «قۇرىعىنا» ءتۇسىرىپ وتىرعان 48 جاسار ايگۇل مولداز قىزىنا بۇعان دەيىن ىزدەۋ جاريالانعاندىعى تۋرالى حابارلانعان بولاتىن.

ايەل ەگدە جاستاعى جالعىز باستى ەر ادامداردىڭ سەنىمىنە كىرىپ، جالعان نەكە قيىپ وتىرعان. نەمەسە ءوز ايلاسىن اسىرعانشا ازاماتتىق نەكەدە تۇرعان. كەيىن تۋىستارىن جۇمىسقا ورنالاستىرامىن، مەملەكەتتىك باعدارلاما بويىنشا تۇرعىن ءۇي الامىز دەگەن جەلەۋمەن اقشا سۇراپ الاتىن بولعان. الاياق حانىم بۇعان دەيىن بىرنەشە مارتە سوتتى بولعان.

2017 -جىلى كەزەكتى قىلمىسىنان كەيىن بوستاندىققا شىققان ول باياعى ادەتىنە تاعى باسقان. جاڭاتاس قالاسىنىڭ 52 جاستاعى ەر ادامىمەن ازاماتتىق نەكەگە وتىرعان ايگۇل ازاماتتىق كۇيەۋىنىڭ تۋعان-تۋىستارىن تاقىرعا وتىرعىزعان. ولارعا مەملەكەتتىك باعدارلاما بويىنشا تارازدا قىمبات ەمەس پاتەر الۋعا كومەكتەسەمىن دەپ، اقشالاردى جيناپ الىپ، تايىپ تۇرعان. قازىرگى ۋاقىتتا پوليتسيادا ءتورت ءوتىنىش بار، ونىڭ ىشىندە ۇشەۋى - سارىسۋ اۋدانىنىڭ تۇرعىندارىنان جانە بىرەۋى سەمەيلىك ەر ازاماتتان.

كريمينالدىق پوليتسيا باسقارماسى قىزمەتكەرلەرىنىڭ ايتۋىنشا، زارداپ شەككەندەردىڭ سانى ارتۋى مۇمكىن. كۇدىكتى ازاماتشاعا كەزەكتى رەت ىزدەستىرۋ جاريالانعاننان كەيىن جەلىدەگى سۋرەتتەردى تانىعان تاراز قالاسىنىڭ تۇرعىنى دەرەۋ 102 گە قوڭىراۋ سوعىپ، ايگۇلدىڭ ورنالاسقان مەكەنجايى تۋرالى حابار بەرگەن.

وسىلايشا قىلمىسكەر قولعا تۇسكەن. تۇرعىننىڭ بەلسەندىلىگى ءۇشىن دەپارتامەنت ماماندارى العىس ءبىلدىردى.

«قىلمىسقا قارسى كۇرەس -  بۇل بۇكىل قوعامنىڭ ءىسى، ال حالىقتىڭ كومەگى وسى قاراما-قايشىلىقتا شەشۋشى ءرول اتقارۋعا قابىلەتتى. پوليتسيا دەپارتامەنتى بارلىق جامبىلدىقتاردى كەز- كەلگەن كۇدىك تۋعىزاتىن وقيعا تۋرالى ىشكى ىستەر ورگاندارىنا دەرەۋ حابارلاۋعا شاقىرادى. تەك وسىلاي، بىرگە، ءبىز ءومىرىمىزدى تىنىش ءارى ءقاۋىپسىز ەتە الامىز. ەگەر ءسىز وسى ايەلدىڭ الاياقتىق ارەكەتتەرىنەن زارداپ شەككەن بولساڭىز، سىزگە ىشكى ىستەر ورگاندارىنا كەلىپ، ءوتىنىش جازۋ قاجەت»، - دەلىنگەن وبلىستىق پوليتسيا دەپارتامەنتىنىڭ باسپا ءسوز قىزمەتىنىڭ مالىمدەمەسىندە.

قازىرگى ۋاقىتتا ۇستالعان نەكە الاياعى تاراز قالاسىنىڭ تەرگەۋ يزولياتورىنا قاماۋعا الىندى. ق ر ق ك 190-بابى 3-بولىگىمەن الاياقتىق بويىنشا سوتقا دەيىنگى تەرگەۋ باستالدى.