ەلەكتروساموكات جۇرگىزۋشىسى جاياۋ جۇرگىنشىمەن سوقتىعىسىپ، ەسىنەن تانىپ قالدى
«2019 -جىلدىڭ 23 -تامىزىندا تاشەنوۆ كوشەسى بويىندا، ايالداماعا تاقاۋ جەردە ەلەكتروساموكات جۇرگىزۋشىسى جاياۋ جۇرگىنشىمەن سوقتىعىسىپ قالدى. ۋاقىتى - تاڭەرتەڭگى ساعات 9. وقيعا كۋاگەرلەرىن نەمەسە ءتيىستى اقپارات بار ازاماتتاردان 77023130315+ نومىرىنە حابارلاسۋلارىن وتىنەمىز. كولىك جۇرگىزۋشىلەردىڭ ءبىرىنىڭ ۆيدەو تىركەۋىشىنە جازىلىپ قالۋى دا مۇمكىن. زارداپ شەككەن ەلەكتروساموكات يەسى ەس-ءتۇسسىز جاتىر. كەز كەلگەن اقپارات ماڭىزدى»، - دەپ جازدى الەۋمەتتىك جەلىلەردىڭ بىرىنە زارداپ شەككەن ازاماتتىڭ دوسى ءارى ارىپتەسى ۇلان اقسۇلتانوۆ.
قازاقپارات تىلشىسىمەن تەلەفون ارقىلى تىلدەسكەن ۇلان وقيعانى ەگجەي-تەگجەيلى ايتىپ بەردى.
«اسقار اۆتوبۋس جولاعىمەن ءجۇرىپ كەلە جاتقاندا الدىنان ءبىر ادام جۇگىرىپ شىققان. ول رۇقسات ەتىلمەگەن جەردەن جولدى كەسىپ وتپەك بولعاندا ساموكاتپەن كەلە جاتقان اسقارمەن سوقتىعىسقان. ۆيدەو بار. ءبىراق قىلمىستىق ءىس قوزعالعاننان كەيىن تەرگەۋ بۇل مالىمەتتەردى جاريا ەتپەۋدى ءوتىندى»، - دەدى ۇلان اقسۇلتانوۆ.
ونىڭ اتاپ وتۋىنشە، زارداپ شەككەن ازامات «استانا» تەلەارناسىندا ديزاينەر بولىپ جۇمىس ىستەيدى. ەلەكتروساموكات تەۋىپ جۇرگەنىنە دە ءبىراز ۋاقىت بولعان.
اۆتور: مارلان جيەمباي
