پويىز جولاۋشىلارى ءۇشىن قانداي وزگەرىستەر ەنگىزىلدى

نۇر- سۇلتان. قازاقپارات - پويىزدا شىلىم شەگۋگە تىيىم سالۋ، جول بيلەتتەرىن قايتارعانى ءۇشىن ايىپپۇلدى الىپ تاستاۋ جانە بيلەت الىپساتارلارىمەن كۇرەستى كۇشەيتۋ شارالارى كۇشىنە ەندى.

 بۇل تۋرالى «جولاۋشىلار تاسىمالى» ا ق- نىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات.

ق ر يندۋستريا جانە ينفراقۇرىلىمدىق دامۋ مينيسترلىگىنىڭ ءتيىستى بۇيرىعى 28 - تامىزدان باستاپ كۇشىنە ەندى.

 «اتاپ ايتقاندا، بۇل وزگەرىستەر زاڭسىز بيلەت الىپساتارلارعا قارسى باعىتتالعان شارالاردىڭ ءبىرى بولىپ تابىلادى. ول ەڭ الدىمەن، جولاۋشىلاردىڭ ۇيىمداستىرىلعان توبىنىڭ جول ءجۇرۋى مەن راسىمدەلۋىنە قاتىستى. ەندى زاڭدى تۇلعالاردان تاپسىرىستى زاڭدى تۇلعانىڭ ەلەكتروندى- سيفرلىق قولى بويىنشا راسىمدەۋگە بولادى. بيلەت بۇرىنعىداي توپتىڭ بارلىق مۇشەسىنە ءبىر بلانكتا ەمەس، ءاربىر جولاۋشىعا بولەك راسىمدەلەدى. رەزەرۆكە قويىلعان ورىنداردى ساتىپ الۋ مەن تاپسىرىس بەرۋ مەرزىمى دە وزگەرتىلدى. جولاۋشىلاردىڭ ۇيىمداسقان توبىنىڭ العاشقى تىزىمىنە وگەرىستەر ەنگىزۋ بويىنشا شەكتەۋ بار. قايتارىلمايتىن دەپوزيت كولەمى توپتىڭ جالپى جول ءجۇرۋ قۇنىنىڭ 30 پايىز قۇراسا، بۇرىندارى ءبىر ورىندى رەزەرۆكە قويۋعا 290 تەڭگە كولەمىندە الىم الىناتىن»، - دەپ حابارلادى كومپانيانىڭ رەسمي وكىلى دياس احمەتشارىپ.

بۇدان باسقا، بارلىق توپتاعى مۇگەدەك تۇلعالارعا، سونداي- اق مۇگەدەك- بالالارعا قاتىستى ەرەجەگە وزگەرىستەر ەنگىزىلدى. ولارعا الەۋمەتتىك- ماڭىزدى باعىتتاردا جول ءجۇرۋ قۇجاتىنىڭ (بيلەتتىڭ) 50 پايىز كولەمىندە، ال كوممەرتسيالىق باعىتتاردا - تاسىمالداۋشىنىڭ قالاۋىنا قاراي جەڭىلدىك بەرىلدى.

 «جولاۋشىلار پويىزىندا تەمەكى تارتۋعا قاتاڭ تىيىم سالىندى. جولاۋشىنىڭ ساپاردان باس تارتۋىمەن بايلانىستى جول ءجۇرۋ قۇجاتىن (بيلەتتى) قايتارۋ وپەراتسياسى ءۇشىن 1000 تەڭگە كولەمىندە الىم الىنىپ تاستالىندى»، - دەدى «جولاۋشىلار تاسىمالى» كومپانياسىنان.