قازاقستاندا قانشا بالا قاراۋسىز قالىپ، ابايسىزدا اجال قۇشتى
بالالار مەن جاس وسپىرىمدەردىڭ جاراقاتتانۋىنا جانە قازاسىنا اكەپ سوقتىراتىن ءارتۇرلى توتەنشە جاعدايلارعا كوبىندە ەرەسەكتەردىڭ نەمقۇرايدىلىعى مەن جاۋاپسىزدىعى سەبەپ بولادى.
20- تامىزدا شىعىس قازاقستان وبلىسىنىڭ سرەديگورنوە اۋىلىندا 2 جاسار بالا جوعالىپ كەتتى. ءۇش كۇننەن كەيىن بالانىڭ دەنەسى اۋلاداعى قۇدىقتان تابىلدى.
26- تامىز كۇنى اقتوبە وبلىسىنىڭ بادامشا اۋىلىندا جەرگىلىكتى تۇرعىندار وزەنگە باتىپ كەتكەن 4 جاسار بالانىڭ دەنەسىن الىپ شىقتى.
جالپى، جىل باسىنان بەرى سۋ ايدىندارىندا 123 بالا سۋعا باتىپ، 119 بالا قۇتقارىلعان. سونداي-اق، بيىل 118 بالا جول اپاتىنان قازا تاۋىپ، 2275 بالا جاراقات الدى.
«جول-كولىك وقيعاسىندا زارداپ شەكپەس ءۇشىن جول ءجۇرۋ ەرەجەلەرىن بالالاردىڭ ەسىنە سالىپ، ولاردى جولدا جانە قوعامدىق كولىكتە بارىنشا ساق بولۋعا ۇيرەتىڭىز. اۆتوكولىكپەن جۇرگەندە بالالار ءۇشىن قاۋىپسىزدىك بەلبەۋى جانە بالالار كرەسلوسى تۋرالى ۇمىتپاڭىز. ونىڭ ۇستىنە جاڭا وقۋ جىلىنىڭ باستالۋىمەن جول-كولىك وقيعالارىنىڭ تۋىنداۋ قاۋپى ايتارلىقتاي ارتادى. جولدا ءجۇرۋ داعدىلارىن قالىپتاستىرۋدىڭ نەگىزگى ءتاسىلى – قاداعالاۋ، ۇلكەندەردىڭ وزدەرى جول ەرەجەسىن ساقتاپ ۇلگى بولۋى كەرەك»، - دەيدى ءى ءى م باسپا ءسوز قىزمەتى.
ىشكى ىستەر مينيسترلىگى ازاماتتاردى بالالارىن ۇيدە جالعىز قالدىرماۋعا شاقىرادى. كۇنى كەشە عانا نۇر-سۇلتان قالاسىندا 4-قاباتتىڭ تەرەزەسىندەگى تورمەن ويناپ وتىرعان 8 جاسار قىز بەن ءسىڭلىسى قۇلاپ كەتىپ، اۋىر حالدە اۋرۋحاناعا جاتقىزىلدى.
سونىمەن قاتار، بيىل 312 جاس ءوسپىرىم وزىنە قول جۇمساپ، ونىڭ 108 ءى ولىممەن اياقتالدى. ودان بولەك، تۇرعىن ءۇي سەكتورىنداعى ءورت كەزىندە 16 بالا قازا بولعان.
«بالالاردىڭ تۇنگى ۋاقىتتا ەرەسەكتەردىڭ قاداعالاۋىنسىز كوشەدە جۇرۋىنە جول بەرمەڭىز. كامەلەتكە تولماعانداردىڭ تۇنگى ۋاقىتتا ويىن-ساۋىق مەكەمەلەرىندە نەمەسە تۇرعىن ۇيدەن تىس جەردە زاڭدى وكىلىنسىز جۇرگەنى ءۇشىن بيىل 40 مىڭنان استام اتا-انا اكىمشىلىك جاۋاپكەرشىلىككە تارتىلدى. بالالاردىڭ بوس ۋاقىتىن قاتاڭ باقىلاۋ كەرەكتىگىن ۇمىتپاڭىز» دەپ كەڭەس بەرەدى مينيسترلىك.
