تالدىقورعاندا جاس وسپىرىمدەر اراسىنداعى قىلمىس ءورشىپ تۇر
جاڭا وقۋ جىلى قارساڭىندا قالالىق ءتارتىپ ساقشىلارى ءبىلىم باسقارماسىنىڭ قىزمەتكەرلەرى، مەكتەپ ديرەكتورلارى جانە مەكتەپكە دەيىنگى ءبىلىم بەرۋ مەكەمە جەتەكشىلەرىمەن كەزدەستى. باستى ماقسات - وقۋشىلار مەن بالالاردىڭ قاۋىپسىزدىگىن قامتاماسىز ەتىپ، توتەنشە جاعدايلاردىڭ الدىن الۋ.
«بيىلعى جەتى ايدا كامەلەت جاسىنا تولماعاندار اراسىندا 39 قىلمىس تىركەلگەن. بۇل وتكەن جىلدىڭ وسى مەرزىمىمەن سالىستىرعاندا 11 فاكتىگە ارتىق»، - دەيدى پوليتسيا باسقارماسىنىڭ باسشىسى ا. نۇرساپا.
سونداي-اق، ونىڭ مالىمەتىنشە، قالا اۋماعىندا جاس وسپىرىمدەرگە باعىتتالعان 5 جەدەل الدىن-الۋ شاراسى ۇيىمداستىرىلعان. ناتيجەسىندە ءارتۇرلى قۇقىق بۇزۋ فاكتىلەرى بويىنشا 634 جاس ءوسپىرىم پوليتسيا بولىمشەسىنە جەتكىزىلىپ، 445 حاتتاما تولتىرىلدى. ق ر ا ك 442-بابى، 2-تارماعى بويىنشا، ياعني بالالاردىڭ تۇنگى ۋاقىتتا زاڭدى وكىلىسىز جۇرگەنى ءۇشىن 287 حاتتاما جازىلدى. كامەلەت جاسىنا تولماعاندارعا الكوگول ءونىمىن ساتقان 12 جاعداي تىركەلگەن. قالا جولدارىندا بالالاردىڭ قاتىسۋىمەن 37 جول-كولىك وقيعاسى بولعان. ءبىر بالا قايتىس بولىپ، 40 جاس ءوسپىرىم جاراقات العان.
كەزدەسۋ سوڭىندا تاراپتار اراسىنداعى بايلانىستى كۇشەيتۋ ماسەلەسى كوتەرىلدى. اتا-انالار مەن مۇعالىمدەر، پوليتسيا قىزمەتكەرلەرى جانە الەۋمەتتىك پەداگوگتار مەن پسيحولوگتار ءبىر-بىرىمەن سەنىمدى ءارى تىعىز قارىم-قاتىناستا بولۋى تيىستىگى ايتىلدى. يۋۆەنالدى پوليتسەيلەر مەن جول-پاترۋل پوليتسەيلەردىڭ، ۋچاسكەلىك ينسپەكتورلاردىڭ اتا-انالار جينالىسىنا قاتىسۋى مىندەتتەلدى. سونداي-اق ءتارتىپ ساقشىلارىنا مەكتەپ ماڭىندا تاڭەرتەڭ جانە ەكىنشى اۋىسىم كەزىندە كەزەكشىلىك جۇرگىزۋ تاپسىرىلدى.
