تارازدا ەگدە جاستاعى كولىك جۇرگىزۋشىسى تانىمال قولونەرشىگە اينالدى
تاراز. قازاقپارات - الىس ساپارلارعا قاتىنايتىن كولىك جۇرگىزۋشى بويىنداعى ونەرىن اشقاننان كەيىن كوپشىلىككە تانىلا باستادى، دەپ حابارلايدى قازاقپارات ءتىلشىسى.
ابىلحان وتەپبەرگەنوۆ ايشا ءبيبى اۋىلىندا تۇرادى. ماماندىعى - زووتەحنيك. جۇرگىزۋشى بولا ءجۇرىپ، بۇكىل قازاق دالاسىن شارلاپ شىققان، رەسەيدىڭ يركۋتسك قالاسىنا دەيىن جۇك تاسىعان. وسىدان ءتورت جىل بۇرىن ابىلحان اعادا كەنەتتەن سۋرەت سالۋ، قولونەر بۇيىمدارىن جاساۋ، اعاش ويۋ ونەرى ويانا باستاعان.
«قايدان كەلگەنىن بىلمەيمىن. قازاق حاندىعىنىڭ 550 جىلدىعىنا ارنالعان ايتىسقا باردىق. «بالاساعۇن» ورتالىق كونسەرت زالىنىڭ دالىزىندە اشىلعان كورمەدەن كونە اعاش ىدىستى كوردىم. ادەمى ناقىشتى قوشقارمۇيىزگە قاراپ تۇرىپ، مەنىڭ دە جاساعىم كەلدى»، - دەيدى ابىلحان وتەپبەرگەنوۆ.
ءۇيىنىڭ اۋلاسىندا جەمىس بەرمەي قويعان ءزاۋلىم ورىك اعاشى ءوسىپ تۇرعان ەكەن. كولەڭكەسىنەن باسقا پايداسى جوق اعاشتى كەسىپ، كەپتىرىپ، قوشقارمۇيىز جاساۋدى قولعا العان.
«قۇرال-سايمانىم ساي بولعان جوق، پىشاق، بالتا، ارانى قولداندىم. جاساعان قوشقارمۇيىزىم كەلىنىمە ۇناپ قالدى. سوعان سىيلاي سالدىم، ول قوشقارمۇيىزدى الىپ ماڭعىستاۋعا كەتتى. كەيىنىرەك ەكىنشىسىن دە جاساپ، سىيعا تارتتىم. ارتىنشا، پيالا، كەسە، ءتۇرلى كادەسىي اتاۋلىنى جاساپ ءجۇردىم. باستاپقىدا جاساعاندارىم وزىمە ۇسقىنسىزداۋ كورىنىپ ءجۇردى، سوندىقتان سۇراعاندارعا بەرىپ جىبەرە بەردىم. جاقىندا عانا ساتۋدى قولعا الدىم»، - دەيدى ول.
قولونەرشى ۇيىندە - جامبىل وبلىسىنىڭ ايشا- ءبيبى اۋىلىندا نەمەسە 20 شاقىرىمدى ەڭسەرىپ، تارازداعى ەجەلگى تورتكۇل كەرۋەن سارايىندا جۇمىس ىستەيدى. مۇندا وبلىستىق تۋريزم باسقارماسىنىڭ قول الۋىمەن «كونە تاراز شەبەرلەرى» ەتنوجوباسى ىسكە اسىرىلۋدا. بۇل كەرۋەن سارايدا وسىدان 15 عاسىر بۇرىن ۇلى جىبەك جولىمەن كەلە جاتقان كەرۋەندەر توقتاپ، تىنىستاعان. سوندىقتان، قايتا جاندانعان تورتكۇل كەرۋەن سارايى «ۇلى جىبەك جولى» تۋريستىك باعدارىنىڭ تانىمال نىساندارى تىزىمىنە ەنىپ وتىر.
ابىلحان اعانىڭ ايتۋىنشا، ولاردىڭ تۇقىمىندا كوركەمونەر شەبەرى، قولونەرشىلەر بولماعان. سوندىقتان بولار، ءوزىنىڭ ونەرىن حوببي دەپ اتاپ، ونى جۇرگىزۋشى كاسىبىمەن قاتار الىپ ءجۇر. دەگەنمەن، ونىڭ قولىنان شىققان بۇيىمدار تورتكۇلگە قىدىرىپ كەلگەندەردى دە، مامانداردى دا ءتانتى ەتىپ جاتىر. نەمەرەسى ءمادينا دا اتاسىنىڭ شەبەرلىگىنە قىزىعىپ، ونى ۇيرەنۋدىڭ الەگىندە.
ەندى تارازعا كەلەتىن تۋريستەر تورتكۇلدە تەك ۇلتتىق تاعامداردى عانا ەمەس، جامبىلدىق شەبەرلەر جاساعان قولونەر بۇيىمدارىن دا الۋ مۇمكىندىگىنە يە. بۇدان تىس، كەرۋەن سارايعا كەلگەن تۋريستەر التىباقان تەۋىپ، جاي تارتادى، حالىق اندەرىن تىڭداپ، ءبي بيلەيدى. ەڭ باستىسى - ون ساۋساعىنان ونەر تامعان شەبەردىڭ كوز جاۋىن الار بۇيىمدارىن جاساۋ بارىسىن تاماشالاي الادى.
