كەدەندە سالىقتان جالتارۋ ءۇشىن قولدانىلاتىن ەڭ ەرەكشە قۋلىقتار اتالدى

نۇر-سۇلتان. قازاقپارات – كەدەندە سالىقتان جالتارۋ ءۇشىن قولدانىلاتىن ەڭ ەرەكشە قۋلىقتار اتالدى. بۇل تۋرالى ق ر قارجى مينيسترلىگى مەملەكەتتىك كىرىستەر كوميتەتىنىڭ باسپا ءسوز قىزمەتىنىڭ حابارلاماسىندا ايتىلادى.

سونىمەن ۆەدومستۆو وكىلدەرىنىڭ ايتۋىنشا، ءبىر ادامدار ايەلدەر تۋفليىنىڭ ءبىر جۇبى ءۇشىن 3 كەلى بويىنشا دەكلاراتسيالانعان، ال تاعى ءبىرى ەرلەر گالستۋگىنىڭ 1 داناسى ءۇشىن 65,6 كەلى دەكلاراتسيالانعان.

سونىمەن قاتار، رۋبيك كۋبيگى - 1 داناسى ءۇشىن 15,1 كەلى، ەرەسەكتەرگە ارنالعان شاقپاق (زاجيگالكا) - ءبىر داناسى ءۇشىن 12,6 كەلى سالماعىمەن دەكلاراتسيالانعان.

اقپارات بويىنشا، كەدەندە باجداردىڭ كەيبىر ستاۆكالارى تاۋاردىڭ سالماعىنا نە سانىنا بايلانىستى بولىپ كەلەدى. 2019-جىلدىڭ باسىنان بەرى «استانا-1» ا ج- دا باعالىق اقپاراتتى اۆتومات تۇردە ىزدەۋ مودۋلى ىسكە قوسىلدى، مۇندا باعالىق اقپارات باعدارلامامەن ەۋرازيالىق ەكونوميكالىق وداقتىڭ بارلىق اۋماعى بويىنشا رەسىمدەلگەن بىرتەكتى جانە بىردەي تاۋارلاردىڭ قورىن مونيتورينگتەۋ جولىمەن ۇسىنىلادى.

مەملەكەتتىك كىرىستەر ورگانى جۇمىسىنىڭ باسىمدىلىعى كولەڭكەلى ەكونوميكاعا قارسى ءىس-ارەكەت، ونىڭ ىشىندە اسىرەسە قىتايدان يمپورتتالاتىن مالىمدەلگەن تاۋارلاردىڭ شىنايىلىعىن قامتاماسىز ەتۋ.

ق ر ق م مكك كەدەندىك ءادىسناما دەپارتامەنتى كەدەندىك قۇن جانە تاريفتىك رەتتەۋ باسقارماسىنىڭ باسشىسى سەرىك سۋمەنوۆتىڭ ايتۋىنشا، جىل باسىنان بەرى كەدەندىك قۇندى باقىلاۋدى كۇشەيتۋدىڭ ەسەبىنەن قوسىمشا - 10,1 ميلليارد تەڭگە كەدەندىك تولەمدەر مەن سالىقتار ءوندىرىلدى. ولاردىڭ 4,9 ميلليارد تەڭگەسى ق ح ر- دان اكەلىنگەن تاۋارلار بويىنشا وندىرىلگەن.

«تاۋار اينالىمىن تالداۋ جانە دەكلاراتسيالاۋدىڭ دەرەكتەر قورىنىڭ مونيتورينگى ادال ەمەس سىرتقى ەكونوميكالىق قىزمەتكە قاتىسۋشىلاردىڭ تاۋارلاردىڭ سالماعى مەن سانىن ايلا-امال جولىمەن كەدەندىك تولەمدەر مەن سالىقتاردى تولەۋدەن جالتارۋ بويىنشا شارالار قولداناتىنىن كورسەتتى» - دەدى سۋمەنوۆ.

قازىرگى ۋاقىتتا، اتالعان سىرتقى ەكونوميكالىق قىزمەتكە قاتىسۋشىلارعا قاتىستى كەدەندىك تولەمدەر مەن سالىقتاردىڭ تيەسىلى سوماسىن قوسىمشا ەسەپتەۋ ماقساتىندا بارلىق قاجەتتى باقىلاۋ ءىس-شارالارى جۇرگىزىلىپ جاتىر. سونداي-اق، بولاشاقتا اتالعان س ە ق ق- مەن تاۋارلاردى كەدەندىك رەسىمدەۋ كەزىندە «استانا-1» ا ج- داعى جاسىل ءدالىزدى قولدانۋعا جول بەرىلمەيدى.

جوعارىدا ايتىلعانداردان بولەك، اتالعان س ە ق ق- لارعا قاتىستى كەدەندىك جانە سالىقتىق باقىلاۋدىڭ بارلىق قاجەتتى شارالارى قولدانىلاتىن بولادى.

«شىنايى دەكلاراتسيالاۋدى جانە تاۋارلاردىڭ كەدەندىك قۇنىن باقىلاۋدى قامتاماسىز ەتۋ مەملەكەتتىك كىرىستەر كوميتەتى قىزمەتىنىڭ باستى باسىمدىلىقتارىنىڭ ءبىرى ەكەنىن اتاپ ءوتۋ قاجەت، جانە بۇل باعىتتاعى جۇمىس جالعاسا بەرەدى»، - دەپ قوستى سەرىك سۋمەنوۆ.

2018-جىلدىڭ باسىنان بەرى «استانا-1» اقپاراتتىق جۇيەسى تاجىريبەلىك پايدالانۋعا ەنگىزىلدى. اتالعان جۇيە تاۋارلاردى كەدەندىك تازارتۋ پروتسەسسىن اۆتوماتتاندىردى. سونىمەن، كەدەندىك باقىلاۋدى جۇرگىزۋ كەزىندە بارلىق مۇمكىن بولاتىن تاۋەكەلدەر بولماعان جاعدايدا، تاۋارلارعا ارنالعان دەكلاراتسيا «جاسىل دالىزگە» جىبەرىلەدى، ياعني اۆتوماتتى تۇردە شىعارىلادى. اتالعان جاڭا ەنگىزىلىم كەدەندىك باقىلاۋدى جۇرگىزۋ كەزىندە ادامي فاكتوردى بارىنشا ازايتۋعا مۇمكىندىك بەردى، سونىسىمەن سىبايلاس جەمقورلىق تاۋەكەلدەرىن ازايتتى.

قازىرگى تاڭدا شامامەن 70 پايىز تاۋارلارعا ارنالعان دەكلاراتسيا جاسىل دالىزدە شىعارىلادى.