ءۇشقوڭىر جايلاۋى ورتەنىپ جاتىر

نۇر-سۇلتان. قازاقپارات – الماتى وبلىسى قاراساي اۋدانى ءۇشقوڭىر جايلاۋىنا قاراستى تاۋ بوكتەرى وتكەن اپتادان بەرى ورتەنىپ جاتىر.

بۇل تۋرالى بۇگىن، 2- تامىزدا ازاتتىققا اۋىل تۇرعىندارى حابارلادى. ولاردىڭ سوزىنشە، «ەكى اڭعار ورتەنىپ، وت ۇشىنشىسىنە جايىلا باستاعان».

- نەشە كۇن جانعان ءشوپتىڭ ءتۇتىنى، ىس اۋىلعا جايىلىپ جاتىر، - دەدى اۋىل تۇرعىندارىنىڭ ءبىرى.

ءۇشقوڭىر اۋىلى ماڭىنداعى تاۋ بوكتەرىندە قۇرعاق ءشوپتىڭ ورتەنىپ جاتقانىن ازاتتىققا الماتى وبلىسىنىڭ توتەنشە جاعداي دەپارتامەنتىنىڭ باسپا ءسوز قىزمەتى راستادى.

- وتكەن بەيسەنبى، 25- شىلدەدە باستالعان ءورت 26 سىندا وشىرىلگەن. كەيىن 27 ءسى تاعى ورتەنىپ، ونى دا سوندىردىك. 30 ى كۇنى تاعى ءورت شىعىپ، 31 كۇنى وشىردىك. ەندى كەشە 1-تامىزدا تۇندە تاعى ءورت تۋرالى اقپارات كەلىپ ءتۇستى. ءالى ءورتتى ءسوندىرىپ جاتىرمىز. وتكەن اپتادان بەرى ءتورت رەت ءورت بولعان. جالپى ورتەنگەن اۋماق 100 گەكتاردان اسادى. قازىر ءورت ءسوندىرۋ جۇمىسىنا جەرگىلىكتى اتقارۋشى ورگاننان 18 ادام جانە قاسكەلەڭ قالاسىنىڭ ءورت ءسوندىرۋ بولىمىنەن 10 ادام جۇمىلدىرىلعان. تاۋلى ايماق بولعان سوڭ تەحنيكامەن ەمەس، جاياۋ ءجۇرىپ، سۋمەن ەمەس «حلوپۋشكامەن» (باسىندا تەمىر قالاعى بار ۇزىن اعاش) ءوشىرىپ جاتىر»، - دەدى توتەنشە جاعداي كوميتەتىنىڭ الماتى وبلىسى بويىنشا وكىلى ازامات جۇرتبايەۆ.

كوميتەت وكىلىنىڭ سوزىنشە، ءورتتىڭ قايتا-قايتا تۇتانۋىنا قۇرعاق اۋا رايى اسەر ەتىپ جاتىر.