پرەزيدەنتكە دە ەلگە ساتىپ جۇرگەن اياق كيىمدەردى ۇسىندىق - داۋرەن رامانقۇل
سەرىكتەسى ايدىن ماقاشپەن بىرگە جىلىنا 1000 اياق كيىم تىگەتىن ءوندىرىس وشاعىن قۇرعان كاسىپكەر قازاقپارات تىلشىسىنە نەلىكتەن ەر ادامداردىڭ عانا اياق كيىمىن تىگەتىنىن ايتىپ بەردى.
الدىمەن «ايقىن» گازەتىندەگى ايشىقتى سۇحبات، ودان كەيىن پرەزيدەنت قاسىم- جومارت توقايەۆتىڭ Twitter- دەگى لەبىزى ادال ەڭبەگىمەن تاسىن ورگە دومالاتىپ جۇرگەن جىگىتتەردىڭ جۇمىسىنا جاڭا سەرپىن سىيلاعان ءتارىزدى. تەلەفون ارقىلى تىلدەسكەنىمىزدە داۋسى كوڭىلدى شىققانىمەن، قايتا- قايتا ارىپتەستەرىنە نۇسقاۋ ايتۋمەن بولدى.
«پرەزيدەنتتىڭ نازارى اۋعانعا دەيىن دە وسىلاي قاربالاس جۇمىس ىستەيتىنبىز. دەگەنمەن، سول اقپارات تاراعاننان بەرى جان- جاقتان حابارلاسقان ادامدار كوبەيىپ كەتتى. بۇل نارىقتا جۇرگەنىمىزگە بىرنەشە جىل بولدى. مەملەكەت باسشىسىنا دەيىن ءانشى مەيرامبەك بەسپايەۆ، سپورتشى قۋات حاميت، مينيسترلەر مەن دەپۋتاتتار، بلوگەرلەر ءبىزدىڭ ونىمدەردى الىپ تۇراتىن. دەپۋتاتتار مەن مينيسترلەردىڭ اراسىندا تۇراقتى تاپسىرىس بەرىپ تۇراتىندارى بار. ءبىر جاعىنان ءونىمنىڭ ساپاسىن ۇناتسا، ەكىنشى جاعىنان قازاقتىڭ قاراپايىم جىگىتتەرىنە قولداۋ بىلدىرگەنى دەپ ويلايمىن»، - دەيدى داۋرەن رامانقۇل.
«ايقىنداعى» سۇحباتتان كەيىن جىگىتتەرگە ق ر پرەزيدەنتىنىڭ باسپا ءسوز حاتشىسى بەرىك ءۋالي حابارلاسىپ، پرەزيدەنت پەن وزىنە، تاعى ەكى ارىپتەسىنە 4 جۇپ اياق كيىمگە تاپسىرىس بەرگەن ەكەن.
«ءبىز تەك ەر ادامداردىڭ اياق كيىمىن تىگەمىز. ويتكەنى، سولاي ىڭعايلى. ءوزى ەر ادامعا ارنالسا، ءوزى كلاسسيكالىق بولسا، ديزايندى قۇبىلتىپ جاتۋعا قاجەتتىلىك جوق. ناقتى پاتەنتتەپ العان ديزايندار جوق. ونىڭ قاجەتى دە شامالى. ايەل ادامدارعا ارناپ تىگۋ ءۇشىن تاڭداۋ اۋقىمى كەڭ بولۋى كەرەك. ءتۇرلى مودەلدەر بولۋى شارت. ەر ادامدار ءۇشىن ءبىر ماۋسىمدا 10-15 مودەل جاراپ تۇر. سوندىقتان، و باستا وسى باعىتتى تاڭدادىق»، - دەيدى داۋرەن رامانقۇل.
ىسكەر جىگىتتەر و باستا ەتىك تىگەمىز دەپ ويلاماپتى.
«بىرلەسىپ جيناعان اقشاعا اۋەلى ءبىر رەت قولدانىلاتىن ىدىس- اياق شىعارماق بولدىق. ودان كەيىن شۇلىق وندىرەمىز دەپ وزبەكستاندى ارالاپ شىقتىق. اقىرى اياق كيىمگە توقتادىق. ويتكەنى، نارىقتا سۇرانىس بار ەكەنىن كوردىك. بىزدىكى تۇتاس ءوندىرىس بولعاندىقتان، پرەزيدەنتكە ارناپ جەكە ديزاين ويلاستىرىپ، ارنايى ماتەريال ىزدەگەن جوقپىز. قاراپايىم ەلگە ۇسىنىپ جۇرگەن ونىمدەرىمىزدى ۇسىندىق. ول كىسىگە دە ۇناعان سياقتى. جالپى، بىزدەگى اياق كيىمدەردىڭ ەڭ قىمباتى 30 مىڭ تەڭگەدەن اسپايدى. ال ساپاسى تۇركيالىق ونىمدەردەن ەش كەم ەمەس. و باستا الدىمىزعا سونداي ماقسات قويعانبىز. ساپاسى يمپورتتىق اياق كيىمنەن كەم ەمەس، باعاسى ارزان بولۋى كەرەك ەدى»، - دەيدى كاسىپكەر.
جىگىتتەردىڭ العاشقى ءونىمى الەۋمەتتىك جەلى ارقىلى ساتىلعان ەكەن.
«وسى فابريكانى ىسكە قوسقاندا Facebook-كە سۇيىنشىلەپ جازدىق. سونى ءبىر اعامىز كورىپ، العاشقى ءونىمىمىزدى ساتىپ الدى. العاشقى كليەنتتىڭ اتىن ەستە ساقتاماپپىن دا. سول كۇنى بەس جۇپ اياق كيىم ساتقانىمىز ەسىمدە قالىپتى. كەيىن ءوندىرىس كولەمىن ۇلعايتا وتىرىپ، مىڭعا جەتكىزدىك. باسقا وڭىرلەردى قويىپ، ءوزىمىزدىڭ الماتىعا جەتپەي جاتىر. ءوندىرىس اياسىن كەڭەيتۋ ءۇشىن قوماقتى ينۆەستيتسيا قاجەت. قازىر ويلاپ وتىرسام، ساۋدامىزدىڭ ءساتتى باستالۋىنا ينتەرنەت تۇرتكى بولعان ەكەن. قاراپايىم زاتتار ساۋداسىنا ءداستۇرلى جارنامادان قاراعاندا وسى ينتەرنەت ءتيىمدى»، - دەيدى ول.
ەسكە سالساق، مەملەكەت باسشىسى قاسىم جومارت توقايەۆ وتاندىق وندىرۋشىدەن اياق كيىم ساتىپ العان بولاتىن. بۇل تۋرالى ق ر پرەزيدەنتى ءوزىنىڭ Twitter پاراقشاسىندا جازدى.
«ايقىن» قاراپايىم ەڭبەك ادامدارىن ۇنەمى ناسيحاتتايدى. جاقىندا ەتىك تىگەتىن جاس كاسىپكەر تۋرالى جاقسى سۇحبات جاريالاندى. وتاندىق ءونىمدى قولداۋ ماقساتىندا مەن دە ءبىر اياق كيىمىن ساتىپ الدىم. ادال ەڭبەك ەتىپ، ناقتى كاسىپپەن اينالىسۋعا دەگەن كوزقاراس ورنىعۋى ءتيىس»، - دەپ جازدى مەملەكەت باسشىسى.
اۆتور: ەسىمجان ناقتىباي