ماڭعىستاۋدا ۇستالعان قىلمىستىق توپ مۇشەلەرىن قاماۋعا الۋ سانكسيالاندى
«اقتاۋ قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى قىلمىستىق توپ مۇشەلەرى ا. ايتقاليەۆ، ە. ارىقباي، ج. جاڭبىربايەۆ، ر. جەكسەنبايەۆ، ە. زورباي، ج. بازاربايەۆ، د. بيمىرزا جانە س. كەنعانوۆقا قاتىستى 2 اي مەرزىمگە قاماۋعا الۋ تۇرىندەگى بۇلتارتپاۋ شاراسىن تاعايىندادى»، - دەلىنگەن وڭىرلىك كوممۋنيكاتسيالار قىزمەتى تاراتقان مالىمەتتە.
ەسكە سالساق، 29- شىلدە كۇنى ۇلتتىق قاۋىپسىزدىك كوميتەتى ىشكى ىستەر مينيسترلىگىمەن بىرلەسىپ، ماڭعىستاۋ وبلىسىندا ارەكەت ەتكەن قىلمىستىق توپ مۇشەلەرىنىڭ زاڭعا قايشى ءىس-ارەكەتىنىڭ جولىن كەسۋ بويىنشا اۋقىمدى ارنايى وپەراتسيا جۇرگىزگەن بولاتىن.
ناتيجەسىندە جاڭاوزەن قالاسى مەن مۇنايلى اۋدانىندا ءبىر مەزگىلدە ءارتۇرلى ءتورت قىلمىستىق توپتان 17 ادام ۇستالدى.
ولاردان 3 تاپانشا، دىبىستى باسەڭدەتەتىن 1 قۇرال، 8 شولاق اڭشى قارۋى، 1 «سايگا» كارابينى، ۇساق كاليبرلى 1 ۆينتوۆكا، 5 تراۆماتيكالىق تاپانشا، 218 دانا وق-ءدارى، ءتۇرلى سۋىق قارۋلار (پىشاقتار، كاستەتتەر جانە ت. ب.) تابىلىپ، ايعاق زات رەتىندە تاركىلەندى.