قازاقستاندىق قاجىلار ساۋد ارابياسىنا كەلدى
«30 -شىلدەدە قازاقستان رەسپۋبليكاسىنىڭ جيددا قالاسىنداعى (ساۋد ارابياسى كورولدىگى) كونسۋلدىعىنىڭ قىزمەتكەرلەرى جيددا حالىقارالىق اۋەجايىندا «شىمكەنت- جيددا» جانە «اقتاۋ- جيددا» باعىتتارىمەن ۇشىپ كەلگەن 198 ادامنان تۇراتىن قازاقستاندىق قاجىلاردىڭ العاشقى ەكى توبىن كۇتىپ الدى. جالپى العاندا، ساك ۇكىمەتى بولگەن كۆوتا بويىنشا بيىلعى جىلى 3,2 مىڭ وتانداسىمىز كورولدىك تەرريتورياسىنداعى قاسيەتتى جەرلەرگە زيارات جاساۋ مۇمكىندىگىنە يە. ۇلكەن قاجىلىق مەرزىمى 9-13 -تامىز ارالىعىنا سايكەس كەلەدى»، دەلىنگەن حابارلامادا.
بيىلعى جىلى، ادەتتەگىدەي، قازاقستاندىق قاجىلاردى كورولدىكتەگى جيددا مەن مەدينا قالالارىنا نۇر- سۇلتاننان، الماتىدان، شىمكەنتتەن جانە اقتاۋدان وتاندىق جانە ساۋدتىق «SCAT» جانە «FlyNas» اۋەكومپانيالارى، سايكەسىنشە، بىرلەسىپ تاسىمالدايدى.
اتاپ ايتقاندا، ساك اۆياتسيالىق بيلىك ورىندارىمەن الدىن الا كەلىسىلگەن كەستەگە سايكەس، ازاماتتارىمىزدىڭ ساۋد ارابياسىنا كەلۋ مەرزىمى 30 -شىلدەگە، قايتۋ مەرزىمى - 17 -تامىزعا بەلگىلەنگەن. قازىرگى ۋاقىتتا قاجىلىق ماۋسىمى كەزىندە ارنايى رەجىمدە جۇمىس ىستەيتىن كونسۋلدىق ەلىمىزدىڭ ەر-رياد قالاسىنداعى ەلشىلىگىنىڭ جالپى ۇيلەستىرۋىمەن قازاقستاندىق قاجىلاردى قابىلداۋ، ولارعا قاجىلىق راسىمدەرىن ءوتۋ كەزدەرىندە قولايلى جاعداي جاساۋ، كورولدىكتە بولۋ كەزەڭدەرىندە قاۋىپسىزدىكتەرىن قامتاماسىز ەتۋ، سونداي- اق ولاردى ەلگە ۋاقتىلى جەتكىزۋ ماسەلەلەرىمەن تىكەلەي اينالىسۋدا. وسى ماقساتتا ساۋد ارابياسىنىڭ «قاجىلىق-2019» ماۋسىمىنا جاۋاپتى ۇكىمەتتىك جانە اۆياتسيالىق بيلىك ورىندارىمەن تىكەلەي بايلانىس ورناتقان.
جالپى، جيددا مەن مەدينا قالالارىندا قاجىلاردى كۇتىپ الۋ مەن شىعارىپ سالۋ كونسۋلدىق تاراپىنان ديپلوماتتاردىڭ كەزەكشىلىك كەستەسى نەگىزىندە قاتاڭ تۇردە جۇزەگە اسىرىلادى. كورولدىكتىڭ جوعارعى وقۋ ورىندارىندا ءبىلىم الۋداعى قازاقستاندىق ستۋدەنتتەر دە بۇل جۇمىسقا ءجيى جۇمىلدىرىلىپ وتىرادى. كونسۋلدىق تاراپىنان قاجىلار اراسىندا تۇرعىلىقتى ەلدىڭ زاڭدىلىقتارىن ساقتاۋ، ءتۇرلى جۇقپالى اۋرۋلاردىڭ (تۇماۋ، مەنينگيت) الدىن الۋ ءۇشىن سانيتارلىق- گيگيەنالىق ەرەجەلەردىڭ ساقتالۋىنا ءمان بەرۋ، جەرگىلىكتى سالت-داستۇرلەرگە قۇرمەتپەن قاراۋ جانە ت. ب. ماسەلەلەر بويىنشا ءتيىستى تۇسىندىرمە جۇمىستارى جۇرگىزىلەدى.
مەككە مەن مەدينا قالالارىنىڭ ورتالىق شتابتارىندا قازاقستاندىق «قاجىلىق- ميسسياسى» ۇيىمداستىرعان ستاتسيونارلىق بولىمشەلەر تاۋلىك بويى جۇمىس ىستەيتىن بولادى. ولاردا قازاقستاندىق دارىگەرلەر تاراپىنان قاجىلارعا العاشقى مەديتسينالىق كومەك بەرىلەدى.
ەسكە سالا كەتسەك، بيىل ساۋد ارابيا بيلىگى بيىلعى قاجىلىققا ۆيزا الۋ جولىن وڭتايلاندىردى. الەمنىڭ ءار تۇكپىرىنەن باراتىن ازاماتتار ەندى قاجىلىق ۆيزاسىن ەلەكتروندى جۇيە ارقىلى الادى.
ايتا كەتەرلىگى، ساۋد ارابياسى كورولدىگىنىڭ قاجىلىق ىستەرى بويىنشا مينيسترلىگى 2018 -جىلى قازاقستانعا قاجىلىق ساپار ءۇشىن 3 مىڭ كۆوتا بولگەن بولاتىن.