سىبىردەگى ءورت قازاقستان ءۇشىن قاۋىپتى مە

نۇر- سۇلتان. قازاقپارات – ق ر ءى ءى م توتەنشە جاعدايلار كوميتەتىنىڭ ءتوراعاسى ۆلاديمير بەككەر رەسەيدىڭ ءسىبىر اۋماعىنداعى ءورتتىڭ تارالۋى قازاقستانعا قاۋىپ تۋدىرمايتىنىن ءمالىم ەتتى، دەپ حابارلايدى قازاقپارات ءتىلشىسى.

«بۇل ءورت بىزگە قاتەر تۋدىرمايدى. توتەنشە جاعدايلاردىڭ ۇيلەستىرۋشىسى رەتىندە بارلىق ورتكە قاتىستى ماسەلەنى باقىلاۋدا ۇستاۋعا جانە دەر كەزىندە كومەك كورسەتۋگە تىرىسامىز»، - دەدى ۆ. بەككەر.

ونىڭ پايىمىنشا، ەل اۋماعى ۇلكەن بولعاندىقتان ءتىلسىز جاۋمەن كۇرەس رەسەيلىك قۇتقارۋشىلار ءۇشىن قيىنعا سوعىپ تۇر.

«ءبىز ءورتتى باستاپقى كەزەڭدە وشىرۋگە بار كۇش- جىگەرىمىزدى سالىپ كەلەمىز. وكىنىشكە قاراي، رەسەيدە تابيعي ورتتەر پروبلەماسى بار. ويتكەنى بۇل ەلدىڭ اۋماعى وتە ۇلكەن. سونىمەن قاتار، بىزدەگى سياقتى ر ف- تە ەلدى مەكەندەر اراقاشىقتىعى تىم الشاق. رەسەيلىكتەر ءورت وشاقتارى انىقتالعان جاعدايدا بىزگە حابار بەرەدى. بۇل شارالار ورتكە ۋاقىتىلى ارەكەت ەتۋ ءۇشىن جاسالادى»، - دەدى ول.

ەسكە سالا كەتسەك، بۇعان دەيىن ەلوردانى باسقان ءتۇتىن رەسەيدەگى ورمان ورتتەرىنەن كەلىپ جاتقانىن حابارلاعان بولاتىنبىز.

25 - شىلدەدەگى مالىمەت بويىنشا، رەسەيدىڭ كراسنويار ولكەسى مەن يركۋتسك وبلىسىندا ورتكە ورانعان ورمان القابىنىڭ اۋماعى ميلليون گەكتاردى قۇرادى.

بۇگىن نۇر- سۇلتان قالالىق تاۋارلار مەن قىزمەتتەردىڭ ساپاسىن جانە قاۋىپسىزدىگىن باقىلاۋ دەپارتامەنتىنىڭ باسشىسى ءسادۋاقاس بايعابىلوۆ سىبىردەگى ورمان ءورتىنىڭ ءتۇتىنى ەلورداعا قايتا كەلەتىنىن، ءبىراق وعان الاڭداۋعا ەش نەگىز جوقتىعىن ءمالىم ەتكەن بولاتىن.

اۆتور: رۋسلان عابباسوۆ