نۇرسۇلتان نازاربايەۆ تۋرالى جاڭا كىتاپ جارىق كوردى

قازاقستان حالقى اسسامبلەياسىنىڭ باستاماسىمەن جارىق كورگەن بۇل جيناق ق ح ا ءتوراعاسى، قازاق ەلىندەگى قوعامدىق كەلىسىم مەن جالپى ۇلتتىق بىرلىكتىڭ اۆتورى نۇرسۇلتان نازاربايەۆقا ارنالعان.

«قازاقستان حالقى اسسامبلەياسى وسى تاريحي ساتكە ەرەكشە ءمان بەردى. بۇل شارانى ادەتتەگى جينالىس ەمەس، قوعامدىق كەلىسىم مەن جالپى ۇلتتىق بىرلىكتى ايقىندايتىن، جاسامپاز يدەيالارى بار قايتالانباس شىعارمانىڭ كوپشىلىك نازارىنا ۇسىنىلعان كۇنى دەپ قابىل ەتىڭىزدەر. ەل تاريحىندا اسسامبلەيانىڭ قۇرىلۋى ماڭىزدى تۇراقتاندىرۋشى فاكتور بولىپ قالىپتاستى. ەستەرىڭىزدە بولار، 1995-جىلى قازاقستاننىڭ ساياسي جۇيەسى ءوزارا ۇيلەسىمسىزدىك سالدارىنان قيىن داعدارىسقا تاپ بولدى. وسى كەزدە، ەلباسىنىڭ شەشىمىمەن اسسامبلەيا قۇرىلىپ، ونىڭ حالىققا تىكەلەي نازار اۋدارۋىنا جول اشىلدى. وسىلايشا، بيلىك پەن قوعام اراسىنداعى ىزگىلىكتىڭ كوپىرى ورنادى. بۇل ساياسي قادامداعى نۇرسۇلتان ءابىش ۇلىنىڭ سارا جولى ەشقاشان ۇمىتىلمايدى»، - دەدى ق ح ا ءتوراعاسىنىڭ ورىنباسارى جانسەيىت تۇيمەبايەۆ كىتاپتىڭ تۇساۋكەسەر راسىمىندە.

ونىڭ ايتۋىنشا، كەڭەس بەرۋشى ورگان رەتىندە قۇرىلعان اسسامبلەيا، كىتاپتا ايتىلعانداي «جالپى ۇلتتىق ديالوگتىڭ الاڭىنا» اينالدى.

«قازاقستاندى رەفورمالاۋ مەن دامىتۋدىڭ وزەكتى ماسەلەلەرىنىڭ بارلىعىندا اسسامبلەيانىڭ ءۇنى بولدى. بۇگىنگى تاڭدا اسسامبلەيانىڭ باستاماسى ارقاسىندا، ءبىزدىڭ ومىرىمىزدە ساياسي قۋعىن-سۇرگىن مەن اشتىق قۇرباندارىن ەسكە الۋ، العىس ايتۋ كۇنى، قازاقستان حالقىنىڭ بىرلىگى كۇنى سەكىلدى ۇعىمدار پايدا بولدى. وسى اتالعان رۋحاني ىستەردىڭ بارلىعى، ءوزىنىڭ باستاۋىن اسسامبلەيا سەسسيالارىنان الادى»، - دەپ ءوز ءسوزىن جالعاستىردى ج. تۇيمەبايەۆ.

سونداي-اق، ق ح ا ءتوراعاسىنىڭ ورىنباسارى كوپتەگەن الەمدىك ساياساتكەرلەر مەن حالىقارالىق ساراپشىلاردىڭ قازاقستاندىق بەيبىتشىلىك ۇلگىسىن جوعارى باعالاعانىن جەتكىزدى. ب ۇ ۇ باس حاتشىلارى كوفي اننان مەن پان گي مۋن ق ح ا مەن ب ۇ ۇ جۇمىسى مەن ۇستانىمدارىن ۇقساتقان بولاتىن. ال رەسەيلىك ۇلتتىق ستراتەگيا ينستيتۋتىنىڭ حالىقارالىق باعدارلامالار بويىنشا ديرەكتورى يۋري سولوزوبوۆ اسسامبلەيانى ەتنيكالىق وكىلدىكتىڭ جاڭا ءتۇرى دەپ سيپاتتادى.

«ەلباسى نۇرسۇلتان نازاربايەۆ پەن پرەزيدەنت قاسىم-جومارت توقايەۆتىڭ ساليقالى ساياساتى ەلىمىزدە تۇرىپ جاتقان بارلىق ەتنوستارعا تەڭدەي جاعداي جاساپ، بىردەي قۇقىقتىق ەركىندىك بەرۋدە. قازاقستاندا تۇرىپ جاتقان بارلىق حالىق پەن ەتنوسارالىق توپتار - ءبىزدىڭ ەلىمىزدىڭ رۋحاني بايلىعى. ەلباسى اتاپ وتكەندەي، جاھاندىق الەم ترانسفورماتسيانى باستان كەشىرۋدە. ەكونوميكا، قوعام ءومىرى، تەحنولوگيا تۇبەگەيلى وزگەرۋدە. ءبىز بۇل وزگەرىستەردى قابىلدايمىز جانە كوپ نارسەگە ۇيرەنەمىز. قوعام بىرلىگى مەن ەتنوسارالىق كەلىسىم وتپەلى كەزەڭدە تۇراقتى ءارى تۇبەگەيلى قۇندىلىق بولىپ قالادى»، - دەدى ق ر مادەنيەت جانە سپورت ءمينيسترى اقتوتى رايىمقۇلوۆا.

جيناق ءۇش تاراۋدان قۇرالعان. ونىڭ العاشقى بولىگىندە ق ح ا ءتوراعاسى نۇرسۇلتان نازاربايەۆتىڭ 1995-1999-جىلدارى سويلەگەن سوزدەرى بەرىلگەن. «جەڭىس پەن جەتىستىككە جىگەرلەندىرۋشى» تاراۋىندا نۇرسۇلتان نازاربايەۆتىڭ قاسىندا قىزمەت ەتكەن جانداردىڭ، ق ح ا مۇشەلەرىنىڭ ەلباسى تۋرالى بۇقارالىق اقپارات قۇرالدارىندا جارىق كورگەن جاريالانىمدارى توپتاستىرىلعان. ءۇشىنشى تاراۋدا «حالقىنىڭ ەلباسىنا اق تىلەگى» اتاۋىمەن ەتنو-مادەني بىرلەستىك وكىلدەرىنىڭ ەلباسى تۋرالى پىكىرلەرى جيناقتالعان. سونداي-اق، كىتاپقا ەلباسىنىڭ جەكە ارحيۆىنەن الىنعان جانە كىتاپحانا قورىندا ساقتالعان قۇندى سۋرەتتەر مەن قۇجاتتار ەنگەن.

«ەلباسى جانە حالقى» كىتابى مىڭ دانامەن جارىق كورگەن. كىتاپتار رەسپۋبليكا كىتاپحانالارىنا جولدانادى.