قازاقستاندا جەتىم بالالار سانى ازايدى
ناتيجەسىندە جەتىمدەر سانى تاعى دا ازايا تۇسپەك. قازىردىڭ وزىندە جاۋدىركوزدەردىڭ قاتارى كەمىگەن. ويتكەنى وزگەنىڭ بالاسىن ءوز باۋىرىنا باسىپ، مەيىرىمىنە بولەگەن اتا-انالار كوبەيدى. ەلىمىزدە جەتىمدەر ازايىپ كەلەدى. جىل سايىن شامامەن مىڭعا كەمىپ وتىر. سەبەپ اتا-انا قامقورلىعىنسىز قالعانداردى اسىراپ، باۋىرعا باسقاندار كوبەيدى. ەل ىشىندەگى بالالار ءۇيىنىڭ ۇشەۋى جابىلعان. بەسەۋى ىقشامداتىلدى. ناتيجەسىندە قازىر ەلىمىزدەگى تاربيەلەنۋشىلەردىڭ سانى - 5 مىڭ. دەگەنمەن كەي اتا-انا اسىراپ العان ۇل-قىزدى قايتارىپ تا جاتادى.
«بالالار ۇيىنە كەلىپ قايتارىپ بەرەتىن ازاماتتار بار. بۇل - ۇلكەن پروبلەما. بالالاردىڭ بويىنداعى جەكە قاسيەتتەرىن كوتەرە المايتىندار بولادى. وزدەرىنىڭ بالالارى سياقتى ءتىلالعىش بولادى دەپ ۇمىتتەنۋى مۇمكىن. ءبىراق جەتىمدەر ۇيىنەن شىققانداردىڭ بارلىعى بىردەي بولا بەرمەيدى. ءتۇرلى قيىندىقتى، ساتقىندىقتى كورگەندەر. سوندىقتان ولارعا ەرەكشە كوزقاراس كەرەك»، - دەيدى ق ر ءبىلىم جانە عىلىم مينيسترلىگى بالالار قۇقىعىن قورعاۋ كوميتەتىنىڭ باس ساراپشىسى گۇلميرا قۇلساريەۆا.
بىزدە بالانى باۋىرعا باسقىسى كەلگەندەرمەن قوعامدىق ۇيىم وكىلدەرى جۇمىس ىستەيدى. ءبىراق، بۇل تۇرعىداعى شارۋانىڭ ءبارىن ارنايى ۇلتتىق اگەنتتىككە بەرۋ كەرەك، - دەيدى ماماندار. اگەنتتىك جۇمىسى ازىرگە زاڭداستىرىلماعان. ءتيىستى زاڭ جوباسى ماجىلىستە كۇزدە قارالماق.
«اگەنتتىك جۇمىسىن پيلوتتىق نەگىزدە باستاۋدى ۇسىندىق. بالالار ءۇيى ءبىراز شوعىرلانعان نۇر-سۇلتان قالاسى مەن قوستاناي، قاراعاندى، اقمولا وبلىستارىندا جۇمىس ىستەسە دە بولار ەدى. ال بالانى اسىراپ الۋعا كەلگەن اتا-انالارعا ارنايى مەكتەپ بولۋ كەرەك. سول جەردە بارلىعى ۇيرەتىلۋى ءتيىس. وسىلايشا اسىراپ الۋشىلاردىڭ جاۋاپكەرشىلىگىن ارتتىرا الامىز»، - دەيدى «انا ءۇيى» قوعامدىق قورىنىڭ اتقارۋشى ديرەكتورى باليا اكىمبەكوۆا.
الداعى ۋاقىتتا جۇمىسىن باستايتىن ۇلتتىق اگەنتتىكتىڭ ماماندارى اسىراندى بالالار مەن اتا-انالاردىڭ اراسىندا دانەكەرلىك قىزمەتىن دە قوسا اتقارماق. ءاربىر وتباسىمەن جەكە اينالىسادى. جالپى قازىر ەلدە بالالاردى پانا بولار وتباسىعا بەرۋ ىسىمەن قوعامدىق ۇيىمدار بەلسەندى ارالاسىپ كەلەدى.
سونىمەن قاتار اتالعان قور جەتىمدەر ۇيىنەن بالا اسىراپ الامىن دەگەن وتباسىلارعا دا جاردەمدەسەدى. وسى كۇنگە دەيىن 740 جانۇياعا قاجەتتى كەڭەس بەرىلگەن. ناتيجەسىندە الگى وتباسىلار مىڭنان اسا بالانى باۋىرعا باسىپتى. بۇل يگى جۇمىس ءالى 3 جىل بويى جۇيەلى تۇردە جۇرگىزىلەتىن بولسا، 5 مىڭ جەتىم دە وزىنە قامقور بولار اتا-انانى تابادى.