قورعانىس ءمينيسترى ارىستا مەرت بولعان اسكەريلەردىڭ وتباسىنا قانداي وتەماقى بەرىلەتىنىن ايتتى

نۇر-سۇلتان. قازاقپارات - ق ر قورعانىس ءميينسترى نۇرلان ەرمەكبايەۆ ارىستاعى جارىلىستا مەرت بولعان اسكەريلەردىڭ وتباسىنا تولەنەتىن وتەماقى تۋرالى ايتتى، دەپ حابارلايدى قازاقپارات.

ەڭ الدىمەن مينيستر قارۋلى كۇشتەردىڭ جەكە قۇرامى اتىنان جارىلىستا مەرت بولعان ءۇش ازاماتتىڭ وتباسىنا كوڭىل ايتتى.

«قولدانىستاعى زاڭناماعا سايكەس، قىزمەتتىك مىندەتىن اتقارۋدا مەرت بولعان اسكەريلەردىڭ وتباسىندا ءبىرقاتار تولەمدەر قاراستىرىلعان. ماسەلەن، لاۋازىمىنا بايلانىستى 5 جىلدىق ەڭبەكاقى كولەمىندە ءبىر رەتتىك تولەم، جەكە باسپانا الۋ ءۇشىن ءبىر رەتتىك تولەمدى ايتۋعا بولادى. وتەماقى كولەمى اسكەري قىزمەتشى جۇمىس ىستەگەن ءوڭىر مەن وتباسى مۇشەلەرىنىڭ سانىنا بايلانىستى بەرىلەدى»، - دەدى ن. ەرمەكبايەۆ ورتالىق كوممۋنيكاتسيالار ورتالىعىندا وتكەن باسپا ءسوز ءماسليحاتىندا.

سونىمەن بىرگە، مارقۇمدى جەرلەۋ، ەسكەرتكىش تۇرعىزۋ، ءمايىتتى جەرلەۋ ورنىنا جەتكىزۋ شىعىندارى كوتەرىلەدى. وزگە ازاماتتاردىڭ ەرىكتى اۋدارىمدارىنا رۇقسات بەرىلەدى.

«ءبىزدىڭ تاجىريبەمىز بويىنشا، قازا تاپقان اسكەريلەردىڭ بالالارىن جەرگىلىكتى اسكەري ورگاندار بەيرەسمي قامقورلىققا الادى. ولاردىڭ وقۋىندا، جۇمىسقا ورنالاسۋىندا نەمەسە وزگە دە ماسەلەلەردە كومەكتەسۋگە تىرىسامىز»، - دەدى مينيستر.

ەسكە سالا كەتسەك، ارىس قالاسىنداعى اسكەري ءبولىمنىڭ قويماسىندا 24 -ماۋسىم كۇنى تاڭەرتەڭ جارىلىس بولدى. سالدارىنان ءۇش ادام قازا تاپتى - ارىس تۇرعىنى مەن ەكى اسكەري قىزمەتشى. 170 كە جۋىق ادام زارداپ شەكتى. 20 عا جۋىق ءۇي، 9 قورا-قوپسى جانىپ، دالالى اۋماقتا 14 وشاق تۇتاندى. ءۇي-جايلار مەن عيماراتتاردىڭ 80-90 پايىزىنا ءارتۇرلى دەڭگەيدە زاقىم كەلدى. ءبىرقاتار وڭىردە شۇعىل جەلىلەر قۇرىلدى.

تۇركىستان وبلىسىنا ارنايى بارعان قازاقستان پرەزيدەنتى قاسىم-جومارت توقايەۆ ارىستاعى اسكەري بولىمشەدەگى وق-ءدارى قويماسىنداعى جارىلىستان زارداپ شەككەن قالا تۇرعىندارىمەن كەزدەسىپ، قالانىڭ قالپىنا كەلتىرىلەتىنىنە ۋادە بەردى. سونداي-اق ەلباسى نۇرسۇلتان نازاربايەۆ ارىستاعى جاعدايعا الاڭداۋشىلىق ءبىلدىردى. تۇڭعىش پرەزيدەنتتىڭ توراعالىعىمەن قاۋىپسىزدىك كەڭەسىنىڭ وتىرىسى ءوتىپ، وندا ارىس قالاسىنداعى احۋال تالقىلاندى.

ۇكىمەت وتىرىسىندا پرەمەر-مينيستر اسقار مامين جارىلىس سالدارىنان كوز جۇمعانداردىڭ تۋعان- تۋىستارىنا كوڭىل ايتىپ، تۇرعىندارعا بارلىق كومەك كورسەتىلەتىنىن ايتتى. كەلتىرىلگەن زالالدىڭ كولەمى باعالانىپ، ۇكىمەت رەزەرۆىنەن اقشا بولىنەدى.

ەۆاكۋاتسيالاۋ كەزىندە مىڭنان استام اتا-انا بالارىنان كوز جازىپ قالدى. سابيلەردىڭ بارلىعى تۋىس-تۋعاندارىنا ءدىن- امان تاپسىرىلدى.

فاكتى بويىنشا قىلمىستىق ءىس قوزعادى.

قالاداعى توتەنشە جاعداي جولاۋشىلار پويىزدارىنىڭ كەستەسىنە دە اسەر ەتتى، ونىڭ ىشىندە حالىقارالىق پويىزدار بار.

25 -ماۋسىم، ساعات 12.00 دەگى جاعداي بويىنشا اسكەري ءبولىم اۋماعىندا جارىلىستار توقتادى. دەگەنمەن، وق-دارىلەر ساقتالاتىن قويمالاردىڭ اۋماعىندا بىقسىعان وتتىڭ وشاقتارى بايقالعاندىقتان، ق ر ىشكى ىستەر مينيسترلىگى جارىلىستاردىڭ قايتالانۋ قاۋپى ساقتالىپ وتىرعانىن ەسكەرتتى.

وسى ۋاقىتتا ق ر قورعانىس مينيسترلىگىنىڭ اسكەري-ينجەنەرلىك قىزمەتشىلەرى ارىس قالاسىن مينادان تازالاۋ جۇمىستارىن جۇرگىزىپ جاتىر. سناريادتاردىڭ دەنى تۇرعىن ءۇي القاپتارىنا تۇسكەن.

ارىس تۇرعىندارىنا كومەك قولىن سوزۋ ماقساتىندا ەلىمىزدە «ارىس، ءبىز بىرگەمىز» اكسياسى باستاۋ الدى.

27 -ماۋسىم، كەشكى ۋاقىتتاعى جاعداي بويىنشا، ارىستا ءورت وشاقتارى تولىعىمەن ءسوندىرىلدى. بۇل تۋرالى جۋرناليستەرگە ارنالعان بريفينگتە ءمالىم ەتىلدى. وعان تۇركىستان وبلىسىنىڭ اكىمى ءومىرزاق شوكەيەۆ، «Nur Otan» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ، ق ر قورعانىس ءمينيسترىنىڭ ورىنباسارى باقىت قۇرمانبايەۆ، ق ر ءىىم توتەنشە جاعدايلار كوميتەتىنىڭ ءتوراعاسى ۆلاديمير بەككەر، ەلىمىزدىڭ باس سانيتارى جانداربەك بەكشين، پروكۋراتۋرا جانە ۆەتەريناريا سالاسىنىڭ وكىلدەرى قاتىستى

«قالاداعى نەگىزگى كوشەلەر مەن الاڭداردىڭ ءبارى تەكسەرىلىپ، تازالاندى. ساپەر ماماندارىمىز 500 دەي سنارياد قالدىعى مەن جارىلعىش زاتتاردى تاۋىپ، زالالسىزداندىردى. قورعانىس مينيسترلىگى تاراپىنان تۇرعىنداردىڭ قاۋىپسىزدىگىن ساقتاۋ باعىتىندا ءتيىستى شارالار اتقارىلۋدا. ەندى ءبىز قالاداعى بارلىق ءۇيدىڭ اۋلاسىن تولىق تەكسەرەمىز. ءدال قازىر قالاعا ەشكىمدى كىرگىزە المايمىز. بۇعان تۇرعىنداردىڭ تۇسىنىستىكپەن قاراۋىن وتىنەمىز. ارىستىقتاردىڭ قاۋىپسىزدىگى باستى نازاردا بولۋى ءتيىس»، - دەدى باقىت قۇرمانبايەۆ.

باس سانيتارلىق دارىگەر قالادا رادياتسيانىڭ مولشەرى قالىپتى نورمادا ەكەنىن ايتتى. قوعامدىق ورىندار، قوقىس كونتەينەرلەرى، نىساندار تولىق تازالانىپ، دەزينفەكسيا جۇرگىزىلەدى. جارىلعان قويمادا راديواكتيۆتى وق-دارىلەر بولماعانىن قورعانىس مينيسترلىگى دە ءمالىم ەتتى. قويمالاردا بولجاممەن 30-50 جارىلىس بولدى. قورعانىس ۆيتسە-ءمينيسترى تيمۋر داندىبايەۆ ستراتەگيالىق ارسەنال نەلىكتەن ارىستاعى تۇرعىن ءۇي كەشەنىنە جاقىن ورنالاسقانىن ءتۇسىندىردى.

تۇركىستان وبلىسىنىڭ اكىمى ءومىرزاق شوكەيەۆتىڭ سوزىنشە، ارىستىقتار ۇيلەرىنە اپتانىڭ سوڭىندا ورالا الادى.