تۇڭعىشباي جامانقۇلوۆ وزىنە كينو الەمىنىڭ ەسىگى جابىلعانىن جايىپ سالدى
«كينو جاعىنان ۇياتتىمىن. ول الەمنىڭ ەسىگى ماعان تارس جابىلدى. بالكىم ەندى ول وبەكتيۆتىك وڭتايلى شارۋا بولار. مۇمكىن مەنىڭ كەلبەتىم جۇرتتى جالىقتىرعان بولار.
بۇرىنعى دوسىم بار. ساتىبالدى نارىمبەتوۆ دەگەن رەجيسسەر. قازىر دە بار عوي ول. امان بولسىن!
سول: «جىلتىڭ-جىلتىڭ ەتىپ، بەتىڭىز كۇندە كورىنە بەرەدى ەكراننان. ال كينوعا جاڭا بەت-الپەت، جاڭا اكتەرلەر كەرەك» دەپ كوڭىلىمدى ءبىر قالدىرعان. ادامگەرشىلىك، دوستىق جاعىنان دا كوڭىلىمدى قالدىرعان تۇستارى بار. ول دوسىما تەك اماندىق تىلەيمىن.
ارينە، ونىڭ ۋاجىمەن كەلىسپەيمىن. مىقتى اكتەرلەر كەز كەلگەن كەزدە سۇرانىسقا يە. بۇل ءجاي سىلتاۋ عوي»، - دەپ اعىنان جارىلدى اكتەر.
سونداي-اق، تۇڭعىشباي جامانقۇلوۆ كينو الەمىنە تۇسۋگە جۇبايىنىڭ دا قورقىنىشپەن قارايتىنىن جاسىرمادى.
«قازىرگى كينوعا تۇسپەي جۇرگەنىمنىڭ، مىنە سەبەپ-سالدارى وسىنداي. ماعان وسىلايشا كينو الەمىنىڭ ەسىگى تارس جابىلدى. مەن تۇگىلى ۇيدەگى جەڭگەڭ دە قورقادى. «بالەگە قالارمىز» دەپ شوشيدى»، - دەدى اكتەر.