بۋرابايدا تۋريستەرگە ارنالعان «ورىندىق-بۋراباي» ارت-قۇرىلىسى ورناتىلدى

بۋراباي. قازاقپارات - بۋراباي كۋرورتىنىڭ تانىمالدىلىعىن ارتتىرۋ ماقساتىندا تۋريستەرگە ارنالعان «ورىندىق-بۋراباي» ارت-قۇرىلىسى ورناتىلدى، دەپ حابارلايدى قازاقپارات ءتىلشىسى.

اقمولا وبلىستىق «Visit Aqmola» تۋريستىك اقپارات ورتالىعىنىڭ مالىمەتىنشە، اتالمىش نىسان ءارتۇرلى تابيعي ماتەريالدار مەن بولشەكتەردەن جاسالعان.

شىعارماشىلىق يدەيا كورەرمەندەردىڭ ەموتسيونالدى اسەرىنە ارنالعان.

«جازدىگۇنى كەز كەلگەن ادام كوپ ۋاقىتىن تابيعات اياسىندا وتكىزگەندى قالايدى. ساياباق، سكۆەردە سەرۋەندەپ، اشىق اسپان استىندا تۋىسقاندارىمەن جانە دوستارىمەن بۋرابايدىڭ سۇلۋ تابيعاتى مەن تەڭدەسسىز ساۋلەت ەسكەرتكىشتەرىن تاماشالاعىسى كەلەدى. «ورىندىق-بۋراباي» ارت-قۇرىلىسى سونداي نىسانداردىڭ ءبىرى سانالادى. نىسان بۋراباي كۋرورتىنىڭ تانىمالدىلىعىن ارتتىرۋ ماقساتىندا تۋريستەرگە ارنالعان. نىساننىڭ ۇزىندىعى 9,80 مەتر، ەنى 1,15 جانە بيىكتىگى 2,33 مەتردى قۇرايدى. ەكى جاقتا ورناتىلعان ورىندىققا 20 ادام ەركىن جايعاسىپ وتىرا الادى»، دەيدى «Visit Aqmola» تۋريستىك اقپارات ورتالىعىنىڭ باسپا ءسوز قىزمەتى.