ءبىر سۋرەتتىڭ تاريحى: كنياجنا تاراكانوۆا

 نۇر - سۇلتان. قازاقپارات - سۋ تارتىلىپ، تارتقانداي قۇراق كۇلگىن،  سەن مىسقىلداپ، مەن بولسام جىلاپ تۇردىم.

 ءومىر دەگەن بۇرقانعان دارياعا

بۇرىمىمنان ۇستاپ اپ لاقتىردىڭ.

 سوندا عانا ەسەيىپ، بۇل جالعاندا

 ءبارى الدامشى ەكەنىن ءبىر- اق ءبىلدىم.

 فاريزا وڭعارسىنوۆا

اتاعى ءبىر عانا تۋىندىسىمەن شىعاتىن سۋرەتكەرلەر بولادى.. . سولاردىڭ ءبىرى -  كونستانتين فلاۆيتسكي. وعان سەبەپ شەبەردىڭ عۇمىرىنىڭ قىسقا بولۋى ەمەس بولسا كەرەك. اسىلىندا ول ءمىنسىز شىعارما جازۋدى كوزدەگەن سىڭايلى.. . پەتەربوردىڭ پەتروپاۆل قورعانىنداعى تۇرمە.. . تور اراسىنان سەل تولاسسىز اعىپ جاتىر.

 تۇرمەنىڭ جۇپىنى كورىنىسىمەن ەش ۇيلەسىم تاپپايتىن قىزىل بارقىت كويلەكتەگى سۇلۋ بويجەتكەن ەندى بىرەر مينۋتتا سۋ استىنا كەتەتىن كەرەۋەتكە ءمىنىپ، شاراسىزدىقتان سىلەيىپ تۇر. ەۋروپانىڭ سەرىلەرى بۇل سۇلۋ ءۇشىن بارىن دا، ءتىپتى جوعىن دا سارپ ەتۋگە دايار ەدى. الايدا، قىرمىزى قىزدىڭ قاقپانىنا تۇسكەندەر ونىڭ شىن مانىسىندە كىم ەكەنىن بىلمەدى. ول ءولىم اۋزىندا جاتقاننىڭ وزىندە شىندىقتىڭ بەتىن اشپاي، قۇپيا كۇيىندە كوز جۇمدى. ونىڭ ەسىمدەرى كوپ ەدى - فرانك حانىم، شەل، ترەمۋيل، الي- ەمەتە، پرينتسەسسا ۆلاديميرسكايا، ەلەونورا، پرينتسەسسا ازوۆسكايا، پرينتسەسسا ەليزاۆەتا ۆلاديميرسكايا - بۇكىلرەسەيلىك كنياجنا، ال، بىزگە ءمالىم كنياجنا تاراكانوۆا ەسىمىن ءوزى ەشقاشان قولدانباعان.

 التىن عاسىردىڭ اۆانتيۋريست ارۋىنىڭ قۇپياسىن اشۋعا تالپىنعان تالاي تاريحشى ەستەلىكتەرىندە وسى اتاۋمەن بەرىلگەندىكتەن، بىزگە دە سولاي جەتكەن ەكەن. ونىڭ قايدان پايدا بولعانى بەيمالىم. بۇل وعان قاتىستى قۇپيالار تىزبەگىنىڭ تەك باستاماسى عانا ەدى. تاراكانوۆا بىرەسە گەنت، بىرەسە لوندون، بىرەسە پاريجدە جۇرەتىن، ونىڭ ەندى قايدان شىعارىنا ادام كوزى ىلەسپەيتىن. جۇرگەن جەرىنىڭ بارىندە قوعام قايماعىنىڭ بەلگىلى وكىلدەرى ەس- ءتۇسسىز عاشىق بولىپ، قالاي قارماعىنا ءىلىنىپ، قالاي قۇر قول قالعاندارىن وزدەرى دە سەزبەي قالاتىن.

ەۋروپادا جاس اۆانتيۋريست قىزدىڭ اسەم بەينەسى، قوڭىر كوزدەرى، قارا شاشتارىنا ءتانتى بولماعان ادام قالمادى. قايدان كەلگەنى بەلگىسىز، وتكەنى تۇمان بيكەش ءوزىن ورىس يمپەراتريتساسى ەليزاۆەتانىڭ ۇرپاعىمىن دەپ جاريالاپ، ەۋروپادان جاقتاستار جيناي باستايدى. يمپەراتريتسانىڭ شىنىمەن دە 1744 -جىلى تۋعان تاعدىرى بەلگىسىز اۆگۋستا داراگان ەسىمدى قىزى بولعان ەكەن. بۇل جالعان ەسىم يەسىن زەرتتەۋشىلەر داراگانعا ۇقساتىپ تاراكانوۆا دەپ اتاپ كەتسە كەرەك. كەيبىر ادامدار ونىڭ سىرتقى كەلبەتىنىڭ راسىندا دا ەليزاۆەتاعا ۇقساس ەكەندىگىن كورەتىن. بۇل سىبىس كوپ ۇزاماي رەسەيگە دە جەتەدى، تاعى ءۇشىن قورقا باستاعان ەكاتەرينا Ⅱوسىنداي تۇسىنىسپەۋشىلىك تۋدىرعان ادامدى ۇستاپ الىپ كەلۋگە ءوزىنىڭ فاۆوريتى الەكسەي ورلوۆتى اتتاندىرادى.

ەۋروپاعا ورىس كەمەسىنىڭ كەلىپ توقتاعانىن ەستىگەن تاراكانوۆا ەش كۇدىكسىز ورلوۆقا ءوزىنىڭ جاقتاسى بولۋدى ۇسىنادى. وعان كەرەگى دە سول ەدى. سول كەزدەگى رەسەيدىڭ ەڭ كەلبەتتى ءارى ءبىلىمدى اتقا مىنەرى گراف ورلوۆ ارۋعا سەزىمىن ءبىلدىرىپ، سەنىمىنە كىرەدى. ەندى تاراكانوۆا مەن ورلوۆ قول ۇستاسا ەليتالىق جيىندارعا، بەدەلدى ادامداردىڭ ۇيلەرىندەگى قوناققا، وپەراعا بارا باستايدى. سونداي كەشتەردىڭ بىرىندە اۆانتيۋريست ارۋ كونتر- ادميرال سامۋيل گرەيگتىڭ كەمەسىن ارالاپ كورۋگە نيەت بىلدىرگەنىن پايدالانىپ، ورلوۆ ونى كەمەدە تۇتقىنعا الادى. ءوزىنىڭ تالايدى تامساندىرعان سۇلۋلىعى مەن جىگىتتەردىڭ جۇرەكتەرىن جارالاۋداعى ءمىنسىز مانسابىنا كامىل سەنىمدى بولعان بيكەش ءبارى ءوزى ويلاعاننان باسقاشا اياقتالارىن سەزبەدى.

تاراكانوۆا حانىم ەكاتەرينا Ⅱقولىنا تۇسكەننەن كەيىن اباقتىعا جابىلادى. ودان كەيىنگى تاعدىرى، ءدال وعان دەيىنگى تاعدىرى سەكىلدى قۇپيا، شىتىرمان وقيعا مەن جالعان اقپاراتتارعا تولى. تاراكانوۆانىڭ تاعدىرى كونستانتين دميترييەۆيچ فلاۆيتسكييدىڭ كارتيناسىنداعىداي اياقتالعان بولۋى ابدەن مۇمكىن.. . تىنىش ءتۇزۋ ءومىر جولىنان گورى، اۆاتيۋراعا تولى تاعدىردى تاڭداعان باسقا دا بيكەشتەر سەكىلدى، كنياجنا تاراكانوۆا بەينەسى دە ءتۇرلى زامان اقىندارى، سۋرەتشىلەرى، مۋزىكانتتارىنىڭ قيالىنا بىرنەشە عاسىرلار بويى قايتا- قايتا ورالىپ، تۋىندىلارىنا ارقاۋ بولدى.

Massaget.kz