قازاقستاندا ارقار اتۋعا رۇحسات بەرىلۋى مۇمكىن

نۇر- سۇلتان. قازاقپارات - كەلەر جىلى قازاقستاندا شەتەلدىك تۋريستەر ءۇشىن ارقار اتۋعا ليسەنزيا بەرىلۋى مۇمكىن، دەپ حابارلايدى قازاقپارات ءتىلشىسى.

«قازاق تۋريزم» ۇلتتىق كومپانياسى حالىقارالىق Wild Sheep Foundation قورىمەن بىرگە ارقار سانىن الەمدىك تاجىريبە نەگىزىندە رەتتەۋدى جولعا قويماقشى. بەس جىلعا ارنالعان جوبانى باستاماشىل توپ تابيعاتتى قورعاۋ سالاسىنا جاۋاپتى ورگاندار مەن ۇيىمداردىڭ الدىندا تانىستىردى.

 «وتكەن عاسىردىڭ ورتا شەنىندە ا ق ش- تا ارقار تۇقىمداستاردىڭ سانى كۇرت ازايىپ كەتكەن بولاتىن. 1960 -جىلى ارقار اۋلاۋ ءىسىن زاڭداستىرۋ قولعا الىندى. اقىلى ليسەنزيادان تۇسكەن اقشا ونىڭ پوپۋلياتسياسىن زەرتتەۋگە، براكونەرلەردەن كۇزەتۋگە باعىتتالدى. وسىنىڭ ارقاسىندا ولاردىڭ سانى قالپىنا كەلىپ قانا قويماي، بۇرىنعىسىنان كوبەيە ءتۇستى. ەڭ باستىسى، ارقاردىڭ تەك اۋرۋشاڭدارى مەن كارىلەرىن عانا اتۋعا رۇقسات ەتىلدى. كەيىن بۇل تاجىريبەنى مەكسيكا، كانادا، يران سياقتى ەلدەر پايدالانىپ، جەمىسىن كوردى. قازىر موڭعوليا، ءۇندىستان، تاجىكستان، قىرعىز رەسپۋبليكاسى دا ارقار سانىن وسى جولمەن رەتتەپ وتىر. بىلتىردان بەرى قازاقستاننىڭ شىعىسى مەن ورتالىعىندا ارقار پوپۋلياتسياسىنا عىلىمي زەرتتەۋ جۇرگىزدىك. سونىڭ ناتيجەسى شىققان سوڭ جوبانىڭ ەكىنشى كەزەڭىن باستايمىز» ، - دەيدى Wild Sheep Foundation قورىنىڭ وكىلى كۋرت الت.

 «قازاق تۋريزم» ۇلتتىق كومپانياسىنىڭ باسقارما ءتوراعاسىنىڭ كەڭەسشىسى باتىر سەيكەنوۆتىڭ ايتۋىنشا، بۇل جوبا اۋىل شارۋاشىلىعى مينيسترلىگىنە ۇسىنىلعالى ەكى جىلعا جۋىقتاپتى.

 «جوبا دايىن. اۋىل شارۋاشىلىعى مينيسترلىگىندە باسشىلار ءجيى اۋىساتىندىقتان، بەكىتا الماي ءجۇرمىز. ءبىر مينيستر قولداسا، ەكىنشىسى كەلىپ توقتاتىپ تاستايدى. ۇسىنىسىمىز وسىمەن ءۇشىنشى ءمينيستردىڭ الدىندا جاتىر. وسى جولى كەدەرگىسىز وتسە، كەلەسى جىلى ليتسەنزيا بەرە باستايتىن شىعارمىز. امەريكالىق ءبىر باي ءۇش ارقارعا الدىن الا قۇن تولەپ قويدى» ، - دەيدى ول.

 ارقار اتۋ ليسەنزياسى نەگىزىنەن شەتەلدىك تۋريستەرگە ساتىلماق. ءبىر باس ارقار اتۋ ءۇشىن شەتەلدىك كەمىندە 100 مىڭ ا ق ش دوللارىن تولەۋ ءتيىس. «100 مىڭ دوللار دەگەن ەڭ بەرگى باعا. مىسالى قاراتاۋ ارقارى الەمدە تەك قازاق جەرىندە عانا كەزدەسەدى. ونىڭ باعاسى كەمىندە 250 مىڭ دوللار بولۋى ءتيىس. بۇدان بولەك ترانسكاسسپيلىك، ساۋىرلىق، جوڭعار، الاتاۋ ارقارى دەگەن تۇرلەرى بار. ءبارى تەك قازاقستان اۋماعىندا كەزدەسەدى. بىزدەگى كەيبىر ارقارلار قىتاي مەن تۇرىكمەنستاندا دا بار. ءبىراق ولاردا اڭ اتۋعا تىيىم سالىنعان. سوندىقتان ارقار اتۋعا قۇمار تۋريستەر ءبىزدىڭ ەلگە كوز تىگىپ وتىر» ، - دەيدى باتىر سەيكەنوۆ.

جوبا مەملەكەت تاراپىنان قولداۋ تاپقان جاعدايدا جىلىنا 30 ارقارعا ليسەنزيا بەرۋ كوزدەلگەن.