شەتەلدە جۇرگەندە قانداي تاماقتاردان تارتىنۋ قاجەت

نۇر-سۇلتان. قازاقپارات - ق ر تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى ءتوراعاسىنىڭ ورىنباسارى جانداربەك بەكشين شەتەلدە ساياحات كەزىندە قانداي تاماقتاردان ساقتانۋ كەرەكتىگىن ايتتى، دەپ حابارلايدى قازاقپارات ءتىلشىسى.

ونىڭ ايتۋىنشا، قازاقستاندىقتاردىڭ تەڭىز تاعامدارىنا دەگەن يممۋنيتەتى ءالسىز. سوندىقتان، ءتۇرلى ەكزوتيكالىق بالىقتار مەن تەڭىز تاعامدارىن تۇتىنعاندا اباي بولۋى قاجەت.

«شەتەلگە ساياحات جوسپارلاعان كەزدە دۇنيەجۇزىلىك دەنساۋلىق ساقتاۋ ۇيىمىنىڭ، ق ر دەنساۋلىق ساقتاۋ مينيسترلىگىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ سايتتارىنا كىرىپ، قاي ەلدەردە قانداي اۋرۋلار تاراپ جاتقانىن ءبىلىپ العان ابزال. ول تۋرالى اتالمىش سايتتاردا تولىققاندا اقپارات بار. شەتەلدە ءتۇرلى ينفەكتسيا جۇقتىرماس ءۇشىن اۋەلى جەگەن تاماق پەن اۋىزسۋعا باسا ءمان بەرگەن ءجون. كوشەدە، بازارلاردا كەزدەيسوق ساۋداگەرلەردەن تاماق ساتىپ الماۋ قاجەت. ەڭ دۇرىسى تانىمال ءدامحانالاردان، ءقوناقۇي قىزمەتكەرلەرى ۇسىنعان جەرلەردەن تاماقتانعان ابزال. ەكزوتيكالىق تاعامدار الۋدان ساقتانعان ءجون. اسىرەسە بالىق جانە تەڭىز تاعامدارىن ابايلاپ تۇتىنۋ قاجەت. كوپتەگەن تەڭىز ونىمدەرىنە ءبىزدىڭ اعزامىزدا يممۋنيتەت بولماۋى مۇمكىن»، - دەدى باس سانيتار.

سونداي-اق ول، اۋىزسۋ ساتىپ الار كەزدە ونىڭ تالاپ بويىنشا ساقتالعانىنا، قانداي قۇتىعا قۇيىلعانىنا ءمان بەرۋ كەرەكتىگىن ايتتى.

ەسكە سالساق، جانداربەك بەكشين الەمدەگى قاۋىپتى ءارى جۇقپالى اۋرۋلارعا بەيىم ەلدەردى اتاعان بولاتىن.