ەلوردادا ماسا-شىركەيدى ۋلاۋ جۇمىستارى قالاي ءجۇرىپ جاتىر؟

نۇر-سۇلتان. قازاقپارات - مەرەكە كۇندەرى قالا قىزمەتى ماسا-شىركەيلەردى ەكى ەسە قارقىندى كۇشپەن ۋلاۋ جۇمىستارىن جۇرگىزدى.

اسىرەسە قالا تۇرعىندارى مەن قوناقتارىنىڭ ەڭ ءجيى باراتىن جەرلەرىنە ەرەكشە نازار اۋدارىلدى، دەپ حابارلايدى قازاقپارات قالا اكىمىنىڭ رەسمي سايتىنا سىلتەمە جاساپ.

ەلوردا كۇنىندە كەشكى سەرۋەنگە شىققان استانالىقتار مەن شاھار قوناقتارى ماسا-شىركەيدىڭ كەسىرىنەن الەككە ءتۇستى. حالىق اكىمدىك پەن ءتيىستى قىزمەتتەرگە شاعىمداندى. الايدا قالاداعى قانسورعىش جاندىكتەردى جويۋ جۇمىسى ءبىر كۇن دە توقتاعان ەمەس. قاناتتى قانسورعىشتاردىڭ شەكتەن تىس كوبەيىپ كەتۋىنە اۋا رايى اسەر ەتكەن بولاتىن.

ءار اۋدان بويىنشا 6-8- شىلدە ارالىعىندا دەزينسەكتسيالىق ءىس-شارالار وتكىزىلدى. ەسىل اۋدانى بويىنشا «جەتىسۋ» جانە «ستوليچنىي» ساياباقتارى، ەسىل وزەنىنىڭ جاعالاۋىنداعى امفيتەاتر، استانالىق سيرك، «استانا» كونسەرت زالى، «حان-شاتىر» س و و اۋماعى، «ۇركەر» تۇرعىن الابىنىڭ 2№ سەكتورى ۋچاسكەسى، «ۇركەر» تۇرعىن الابىنىڭ 2№ ۋچاسكەسى، «بارىس-ارەنا» سپورت كەشەنى، «استانا وپەرا»، «استانا بالەت»، ەكسپو كەشەنىنىڭ جازعى ساحناسى، «Happylon MEGA Silk way» جانە «Happlon Keruen»  ورىندارىندا ماسادان تازارتۋ شارالارى جۇرگىزىلدى.

وعان 2 ەنتومولوگ، 26 دەزينفەكتور، 3 تەرموگەنەراتور بريگاداسى، 3 اۆتوكولىك,1 ميكرواۆتوبۋس، 1 دۋ-1000 تەحنيكاسى جۇمىلدىرىلدى.

الماتى اۋدانى بويىنشا وڭتۇستىك-شىعىس شاعىن اۋدانىنىڭ وڭ جانە سول جاعى تازالاندى. وعان 3 بريگادا، 3 اۆتوكولىك، 3 بيولوگ قاتىستى، ولار ءتيىستى جۇمىستى تەرموگەنەراتورلار، جەل گەنەراتورى جانە روتورلىق بۇرىككىشتەر ارقىلى جۇرگىزەتىن بولادى. سارىارقا اۋدانى بويىنشا «كوكتال-1» تۇرعىن الابىنىڭ اۋماعى وڭدەلدى.

ماسا-شىركەيگە قارسى جۇمىسقا 2 تەرموگەنەراتور بريگاداسى، 3 اۆتوكولىك، 1 ەنتومولوگ جانە 1 دۋ-1000 تەحنيكاسى جۇمىلدىرىلدى. ماسا- شىركەيگە قارسى جۇمىس اۋا رايى جاعدايىنا سايكەس كەز كەلگەن كۇنى جۇرگىزىلەدى.