ەڭبەك مينيسترلىگىندە قاعازباستىلىقپەن كۇرەس شارالارى تالقىلاندى
نۇر- سۇلتان. قازاقپارات - ق ر ەڭبەك جانە حالىقتى الەۋمەتتىك قورعاۋ مينيسترلىگى 23 مەملەكەتتىك قىزمەتتى اۆتوماتتاندىرۋ جانە وڭتايلاندىرۋعا قاتىستى شارالار اتقارىلۋدا.
بۇل تۋرالى اتالعان ۆەدومستۆونىڭ ۆيتسە- ءمينيسترى ناريمان مۇقىشيەۆ ءمالىم ەتتى، دەپ حابارلايدى قازاقپارات ءتىلشىسى.
«مينيسترلىك مەملەكەتتىك قىزمەتتەردى وڭتايلاندىرۋ مەن اۆتوماتتاندىرۋ بويىنشا جۇمىستى جالعاستىرىپ جاتىر. اۆتوماتتاندىرىلعان ءارى ەلەكتروندىق قىزمەتتەر سالاداعى اشىقتىقتى قامتاماسىز ەتەتىنىن تۇسىنەمىز. بۇگىندە 23 مەملەكەتتىك قىزمەتتى اۆتوماتتاندىرۋ جانە وڭتايلاندىرۋ تۇرعىسىندا 13 جول كارتانى ورىنداۋ شارالارى مينيسترلىككە تيەسىلى» ، - دەدى ن. مۇقىشيەۆ ق ر سىبايلاس جەمقورلىققا قارسى ءىس- قيمىل اگەنتتىگى وكىلدەرىمەن بىرگە وتكەن كەڭەستە.
وسى ورايدا ول ۆەدومستۆو جۇمىسىنداعى قاعاز اينالىمىن ازايتۋ شارالارى ىسكە اسىرىلىپ جاتقانىن اتاپ ءوتتى.
«وڭتايلاندىرۋ جۇمىستارى بارىسىندا قاعازباستىلىقتى جويىپ، قىزمەتتەردى سيفرلىق، ەلەكتروندىق جۇيەگە كوشىرۋگە ۇمتىلۋدامىز. بۇل رەتتە وڭتايلاندىرۋ، اۆتوماتتاندىرۋ قادامدارىن ىسكە اسىرۋدى قاجەت ەتەتىن باعىتتار ءالى دە بار. وسى باعىتتا ءتيىستى مەملەكەتتىك ورگاندارمەن، سىبايلاس جەمقورلىققا قارسى ءىس- قيمىل اگەنتتىگىمەن بىرلەسە اتقاراتىن جۇمىستار ەسكەرىلگەن» ، - دەدى ۆيتسە- مينيستر.