قازاقستانداعى جولداردىڭ قاۋىپسىزدىگى «جۇلدىزدارمەن» ولشەنەدى

 بۇل تۋرالى «جول اكتيۆتەرىنىڭ ساپاسى ۇلتتىق ورتالىعى» ر م ك باس ديرەكتورى زامير ساعىنوۆ ق ر سىبايلاس جەمقورلىققا قارسى ءىس- قيمىل اگەنتتىگىندە وتكەن بريفينگتە ايتتى، دەپ حابارلايدى قازاقپارات ءتىلشىسى.

زامير ساعىنوۆتىڭ ايتۋىنشا، اتالمىش جۇيەنى قۇرۋ جۇمىستارى بيىل اياقتالادى. «بۇل جۇيە بىزگە نە بەرەدى؟ 3-4 جىل ىشىندە ءبىز بارلىق جول جەلىسىنە دياگنوستيكا جۇرگىزەمىز. ياعني، بارلىق اقپاراتتى، قاشان جانە قانداي جوندەۋ جۇرگىزىلگەنىن سارالايمىز. سول بويىنشا قاي جولدى قاشان جوندەۋ كەرەكتىگى تۋرالى ۇسىنىستار بەرىپ وتىرامىز. دۇنيەجۇزىلىك بانكتىڭ باعالاۋىنشا، ۋاقىتىندا جۇرگىزىلمەگەن جوندەۋ جالپى شىعىنداردى 2-3 ەسەگە ۇلعايتادى. بۇل جۇيەگە ءاربىر ازامات قاتىسا الادى. ءوزى تۇراتىن اۋماقتاعى جولدىڭ ساپاسى تۋرالى اقپارات ۇسىنۋىنا بولادى» ، - دەدى ول.

سونداي- اق، ول بولاشاقتا ەلدەگى جولداردىڭ قاۋىپسىزدىك دەڭگەيى بويىنشا بىرنەشە ساناتقا بولىنەتىنىن جەتكىزدى. «جاقىندا ءبىز قاۋىپسىزدىك دەڭگەيى بويىنشا جولداردى سارالاۋ جۇيەسىن ەنگىزۋدى جوسپارلاپ وتىرمىز . باعالاۋ ءبىر جۇلدىزدان بەس جۇلدىزعا دەيىن. ءبىر جۇلدىز - ءقاۋىپتى جول، 5 جۇلدىز - ءقاۋىپسىز جول دەگەندى بىلدىرەدى» ، - دەپ اتاپ ءوتتى كاسىپورىن ديرەكتورى.

زامير ساعىنوۆ جول سالۋ جانە جوندەۋ كولەمى ارتقان سايىن سىبايلاس جەمقورلىق تاۋەكەلدەرى دە ارتاتىنىن ايتادى. «سوندىقتان، ورتالىق بازاسىندا سىبايلاس جەمقورلىققا قارسى ءىس- قيمىل اگەنتتىگىنىڭ قولداۋىمەن جوبالىق كەڭسە قۇرىلادى. وندا بارلىق ساتىلاردا سىبايلاس جەمقورلىق تاۋەكەلدەرى تالدانادى، بارلىق بيزنەس- پروتسەستەردى سيفرلاندىرۋ بويىنشا شەشىمدەر قابىلدانادى. وسىنىڭ ءبارى ءار ازامات ءۇشىن اشىق قولجەتىمدى بولادى» ، - دەدى ورتالىق وكىلى.