جارىلىس كەزىندە جۇمىس ورنىن تاستاماعان ارىستىق: كاسىپكە ادالدىق كەرەك

كوپ جىلداردىن بەرى بانكتە كۇزەتشى بولىپ جۇمىس ىستەيتىن پەرنەحان بەكمىرزايەۆ جان-جاقتا جارىلىس بولىپ جاتقاندا، جۇمىس ورنىن تاستاپ كەتپەگەن.

«ءبىز ءتارتىپ بويىنشا باسشىلىقتىڭ رۇقساتىنسىز ەشقايدا كەتپەۋىمىز كەرەك. ويتكەنى ءوزىڭىز بىلەسىز، بانكتىڭ جۇمىسى وتە جاۋاپتى. سوندىقتان دا مەن جارىلىس بولىپ جاتقان كەزدە، قاۋىپتى بىلسەم دە ءوز جۇمىس ورنىمدا بولىپ، باسشىلىقتان نۇسقاۋلىق كۇتتىم»، - دەيدى پەرنەحان بەكمىرزايەۆ.

ارىستىق تۇرعىن ءوزىنىڭ بۇل ءىسىن باتىرلىق دەپ ەسەپتەمەيدى.

«ويتكەنى مەنىڭ ورنىمدا بولعان ءاربىر ادام وسىلاي ىستەيدى، جالپى كاسىپكە دەگەن ادالدىق بولۋ قاجەت»، - دەيدى ول.

ەسكە سالا كەتسەك، ارىس قالاسىنداعى اسكەري ءبولىمنىڭ قويماسىندا 24 -ماۋسىم كۇنى تاڭەرتەڭ جارىلىس بولدى. سالدارىنان ءۇش ادام قازا تاپتى - ارىس تۇرعىنى مەن ەكى اسكەري قىزمەتشى. 170 كە جۋىق ادام زارداپ شەكتى. 20 عا جۋىق ءۇي، 9 قورا-قوپسى جانىپ، دالالى اۋماقتا 14 وشاق تۇتاندى. ءۇي-جايلار مەن عيماراتتاردىڭ 80-90 پايىزىنا ءارتۇرلى دەڭگەيدە زاقىم كەلدى. ءبىرقاتار وڭىردە شۇعىل جەلىلەر قۇرىلدى.

تۇركىستان وبلىسىنا ارنايى بارعان قازاقستان پرەزيدەنتى قاسىم-جومارت توقايەۆ ارىستاعى اسكەري بولىمشەدەگى وق- ءدارى قويماسىنداعى جارىلىستان زارداپ شەككەن قالا تۇرعىندارىمەن كەزدەسىپ، قالانىڭ قالپىنا كەلتىرىلەتىنىنە ۋادە بەردى. سونداي-اق ەلباسى نۇرسۇلتان نازاربايەۆ ارىستاعى جاعدايعا الاڭداۋشىلىق ءبىلدىردى. تۇڭعىش پرەزيدەنتتىڭ توراعالىعىمەن قاۋىپسىزدىك كەڭەسىنىڭ وتىرىسى ءوتىپ، وندا ارىس قالاسىنداعى احۋال تالقىلاندى.

ۇكىمەت وتىرىسىندا پرەمەر- مينيستر اسقار مامين جارىلىس سالدارىنان كوز جۇمعانداردىڭ تۋعان-تۋىستارىنا كوڭىل ايتىپ، تۇرعىندارعا بارلىق كومەك كورسەتىلەتىنىن ايتتى. كەلتىرىلگەن زالالدىڭ كولەمى باعالانىپ، ۇكىمەت رەزەرۆىنەن اقشا بولىنەدى.