مارستا تىرشىلىك بار ما

«كيۋريوسيتي» (مارستاعى زەرتتەۋ اپپاراتى) ەندى قوسىمشا زەرتتەۋ جۇرگىزىپ كورمەك»، - دەپ حابارلايدى The New York Times باسىلىمى.

«جاقىندا ناسا-نىڭ «كيۋريوسيتي» مارس اپپاراتى كوپ مولشەردەگى مەتان گازىنىڭ ءبولىنىسىن انىقتادى. جەر شارىندا مەتان گازى ءتىرى اعزالاردان بولىنەتىندىكتەن، عالىمدار بۇل جاڭالىقتى ءىلىپ الىپ، كەڭىنەن تالقىلاپ كەتتى»، - دەپ جازادى اۆتور. ونىڭ ايتۋىنشا، دەمالىس كۇندەرى عالىمدار قوسىمشا زەرتتەۋ جاساۋدى جوسپارلاپ وتىر. مارس اپپاراتى ەندى قوسىمشا مالىمەتتەر جيناستىرۋدا.

«ادامداردى مارستا ءومىر بارى ۇزاق ۋاقىت شابىتتاندىرىپ كەلەدى. 1970 -جىلى «ۆيكينگ» اپپاراتى پلانەتادا ءشول دالا لاندشافتىنىڭ سۋرەتىن تۇسىرگەن بولاتىن. جيىرما جىلدان استام ۋاقىت وتكەن سوڭ پلانەتولوگتار ءتورت ميلليون جىل بۇرىن مارستىڭ جىلى جانە ىلعالدى بولعانىن انىقتادى. ەندى عالىمدار بۇرىن مارستا تىرشىلىك بار بولعان بولسا، وندا سودان قالعان ميكرواعزالار سول جەردە ساقتالىپ قالۋى مۇمكىن دەپ بولجاپ وتىر»، - دەلىنگەن ماقالادا.

باسىلىمنىڭ جازۋىنشا، مەتاننىڭ ءبولىنۋى عالىمدارعا ۇلكەن كورسەتكىش بولىپ وتىر. عالىمدار انىقتاعان مەتان اعزالاردان جاقىندا بولىنگەن بولۋى كەرەكتىگىن ايتتى.

«ناسا اگەنتتىگى مارستان مەتاننىڭ تابىلعانىن راستادى جانە ونى «الدىن الا مالىمەتتەر» دەپ اتادى. ناسا وكىلى عىلىمي دالدىك بولۋى ءۇشىن جوبا عالىمدارى مالىمەتتەردى ساراپتاۋدى جالعاستىراتىنىن ايتتى. بۇعان دەيىن ون بەس جىل بۇرىن مارستا مەتاننىڭ تابىلعانى ايتىلعان ەدى. دەگەنمەن، ەۋروپا عارىش اگەنتتىگىنىڭ «مارس-ەكسپرەسس» اپپاراتى العان مالىمەتتەر قاتەلىك دەگەن بولجام جاسالعان بولاتىن. 2012 -جىلى دا Curiosity اپپاراتى مارستان مەتان تابا المادى. ال 2013 -جىلى مارستا مەتان كولەمىنىڭ ارتا باستاعانى انىقتالدى»، - دەپ جازادى اۆتور.