جاۋاپسىز سۇراقتاردىڭ قاراپايىم شەشىمى

نۇر-سۇلتان. قازاقپارات -ءبىز - قىزىق ءارى ەرەكشە جاراتىلىسپىز. ويلاۋ جۇيەسىنىڭ ءوزى بىرنەشە بولىكتەرگە ءبولىنىپ، كەيدە ءبىز تۇسىنبەيتىن ارەكەتتەردى عىلىمدا وتە قاراپايىم قۇبىلىس ارقىلى جەتكىزەدى.

ەگەر ءسىزدى كەيدە «نەگە؟» دەگەن كوپ سۇراق مازالايتىن بولسا، مىنا تۇسىنىكتەرگە نازار سالىپ كورىڭىز. مۇمكىن، كەي سۇراعىڭىزدىڭ جاۋابى وسىندا شىعار...
1. اس بولمەسىنە نە ءۇشىن بارعانىمىزدى ۇمىتىپ قالامىز. سەبەبى نەدە؟

تانىس جاعداي: اس بولمەسىنە جۇگىرىپ كىرەسىز، ءبىراق نە ءۇشىن، قانداي ماقساتپەن كەلگەنىڭىزدى ۇمىتىپ قالاسىز. بۇل جاعداي قىسقا مەرزىمدى جادىمەن تىكەلەي بايلانىستى. جادىنىڭ بۇل ءتۇرى ۇزدىكسىز جۇمىس ىستەيدى. ءبىز سەكۋند سايىن ويلانامىز، اقپارات ميعا اسقان جىلدامدىقپەن تۇسەدى دە، سول مەزەتتە جوعالادى. نەگىزى، بارلىق جاڭا مالىمەت بەلسەندى نەيرون ۇلگىسىندە ساقتالادى، ال بۇل - قيىن ءۇردىس. كەيدە بۇل سەنىمدى جۇيەدە قاتەلىك تۋادى. اقپارات وزدىگىنەن جوعالۋى مۇمكىن. سوندىقتان، كەلەسى بولمەگە نە ءۇشىن بارعانىڭىزدى ۇمىتىپ قالاسىز. اسىرەسە، بۇل ءۇردىس وزگە نارسەنى ءجيى ويلاعاننان بولادى. قىسقا مەرزىمدى جادىنىڭ كولەمى ءتورتتىڭ ءبىر بولىگىنە تەڭ - اقپارات ءبىر مينۋتتان ارتىق ساقتالمايدى. سوندىقتان، ءسىز قوس نارسەنى قاتار ويلاعان كەزدە، جاڭا اقپارات ەسكىنى ىعىستىرىپ تاستايدى.
2. نەگە سىنعا توتەپ بەرە المايمىز؟
ەلەستەتىپ كورىڭىزشى، شاش ۇلگىڭىزدى وزگەرتتىڭىز دە، جۇمىسقا كەلدىڭىز. ون ادامنىڭ توعىزى سىزگە «كەرەمەت» دەپ سۇيسىنسە، ءبىر ادام عانا جاراسپايتىنىن ايتتى. قاي ادامنىڭ ءسوزى ەسىڭىزدە ساقتالىپ قالادى؟ مۇنىڭ دا سەبەبى بار، ويتكەنى، مي ءۇشىن ماداقتان گورى سىن ماڭىزدىراق. سىزگە بىرەۋ ەسكەرتۋ جاساسا نەمەسە وزگە ادامنىڭ سىزگە دەگەن جاعىمسىز قىلىعىن بايقاساڭىز، ساناڭىز جەڭىل كۇيزەلىسكە ۇشىرايدى. جاۋاپ رەتىندە دەنەڭىز كورتيزول گورمونىن بولە باستايدى. كورتيزول تەك كۇيزەلىس كەزىندە عانا ءبولىنىپ قويماي، ادامنىڭ «ۇر دا جىق» رەاكتسياسىن قوزدىرادى. ياعني، ادام سىنعا قارسى جاۋاپ قايتارۋعا دايىن بولادى. ماسەلە تەك فيزيولوگيادا عانا ەمەس، پسيحولوگيامەن دە تىعىز بايلانىستى. ماقتاۋ - سىپايىلىق. ال، سىن - ەرىكسىز نازار اۋدارتاتىن جاعىمسىز جاعداي. سونىمەن قاتار، ءبىزدىڭ كورۋ جۇيەمىز بەيسانالى تۇردە سىرتقى ورتادان بىزگە تونەتىن مۇمكىن قاۋىپتەردى ىزدەۋمەن بولادى. ونى ءبىز كۇلىمدەپ تۇرعان ارىپتەسىمىزدەن گورى، تۇنەرىپ وتىرعان ارىپتەستەردەن بايقايمىز. سانامىز ونى «قاۋىپتى» ادامداردىڭ قاتارىنا قوسىپ قويادى.
3. نەگە ءوز قابىلەتىمىزگە كۇمانمەن قارايمىز؟

اقىلدى ادامدار تالاستا اقىماقتاردان جەڭىلىپ قالادى، ويتكەنى، «ەسسىزدەر» وزدەرىنە الدەقايدا سەنىمدىرەك. مۇنى عىلىمدا «داننينگ - كريۋگەر ەففەكتىسى» دەپ اتايدى. داننينگ جانە كريۋگەر ەسىمدى پسيحولوگ ماماندار مىنانداي تاجىريبە وتكىزەدى. ولار قاتىسۋشىلارعا تاپسىرما بەرىپ، شەشىمىن قالاي تاپقاندارىن بىلمەك بولادى. تاپسىرمانى دۇرىس ورىنداماعاندار سەنىمدى تۇردە وزدەرىنىڭ ارەكەتى «دۇرىس» ەكەنىن دالەلدەمەك بولعان. ال، تاپسىرمانى ورىنداعاندار ءوز ارەكەتىنە كۇماندانا باستاعان.

داننينگ جانە كريۋگەر مىناداي گيپوتەزا كەلتىردى: اقىماق ادامدارعا تەك ويلاۋ قابىلەتى عانا جەتىسپەيدى دەۋ - قاتەلىك. ولارعا وزدەرىنىڭ قولدارىنان كەلمەيتىنىڭ ۇعۋ دا قيىندىق تۋدىرادى. اقىلدى ادامدار ءار ۋاقىت جاڭا نارسەنى ۇيرەنەدى. سوندىقتان، ءوز ويىن 100 پايىزعا دۇرىس دەپ ايتا المايدى. ويتكەنى، ءار سۇراقتىڭ جاۋابى بولا الاتىن زەرتتەلمەگەن اقپاراتتىڭ كوپ ەكەنىن تۇسىنەدى. ال، اقىماق ادامدار مۇنداي كۇمانمەن ءومىر سۇرمەيدى، سوندىقتان، ءوزىنىڭ دۇرىستىعىن دالەلدەۋ - ولار ءۇشىن جەڭىل.

Massaget.kz