ارىسقا ورالعان تۇرعىنداردى قانداي ماسەلە مازالايدى

كۇتپەگەن جەردەن توتەنشە جاعدايعا تاپ بولعان جۇرتتى قازىر قانداي ماسەلەلەر مازالايتىنى بەلگىلى بولدى، دەپ حابارلايدى قازاقپارات ءتىلشىسى.

ارىس قالاسىنىڭ تۇرعىنى اينۇر مۇراتبەكوۆانىڭ ايتۋىنشا، ونى ەڭ الدىمەن باسپاناسىنىڭ جاعدايى مازالايدى.

«ءۇيىمنىڭ ەسىگى مەن تەرەزەسى سىنعانىن ءبىلدىم، بىرەۋلەردىڭ ءۇيى ورتەنىپ كەتكەن دەپ جاتىر. ورتاسىنا ءتۇسپ كەتكەن دەپ ايتىلۋدا. ۇيدەن قاشقاندا قۇجاتتارىمدى دا الىپ ۇلگەرمەگەن ەدىم، ونىڭ دا بار-جوقتىعىن بىلمەي تۇرمىن. قالتامدا ازىن اۋلاق بولسا دا قاراجاتىم جوق. بارعاندا تىم بولماسا اس اۋقات الۋ دا مۇڭ بولىپ تۇر. بۇرىن اسكەري بولىمدە جۇمىس ىستەيتىن ەدىم، كەيىن قىسقارتىپ جىبەردى. تويحاناعا جۇمىسقا تۇرعان ەم، ولار دا قيراپ جاتىر دەپ ەستىدىم. سوعان قاراعاندا جاقىن ارادا جۇمىسىم دا بولمايتىن سياقتى. ۇيدە جالعىز ءوزىم تۇراتىندىقتان سەنەتىن ادامىم دا بولماي تۇر»، - دەيدى اينۇر مۇراتبەكوۆا.

ال، جانسۇلۋ بايماحانوۆا ءوزىنىڭ بالالارىنا الاڭداپ وتىرعانىن ايتادى. ولارعا اس اۋقات تاۋىپ بەرۋ، جاتاتىن ورىن تابۋ جاعى جاس كەلىنشەككە قيىندىق تۋعىزىپ وتىر ەكەن.

«ءبىزدىڭ ءۇيىمىز اسكەري بولىمگە جاقىن جەرگە ورنالاسقان. ءىنىم بارىپ كورگەن ەكەن، قيراپ قالىپتى. دۋالدارى كوشىپ، تەرەزەلەرى سىنىپ كەتىپتى. باسقا باراتىن جەرىمىز جوق. ونىڭ ۇستىنە اقشام دا جوق. كىشكەنتاي سابيىمە تاماق تاۋىپ بەرۋىم كەرەك»، - دەيدى جانسۇلۋ بايماحانوۆا.

82 جاستاعى قاريا مىرزالى سيقىمبايەۆتى دا باسپانا ماسەلەسى مازالايدى. زەينەتكەردىڭ ايتۋىنشا، جارىلىس بولعاندا شىمكەنتتەگى تۋىستارىن پانالاپ كەتكەن. الايدا سەگىز جان ءبىر ۇيگە سىيماعاندىقتان، ءار كۇنى ءار تۋىسىنىڭ ۇيىندە تۇنەگەن. بۇگىن كوشىرىپ جاتىر دەگەن سوڭعى ارىسقا جەتۋگە اسىعىپ وتىر.

«ءبارىمىز توپىرلاپ ءار ۇيدە قاشانعى جاتامىز. كەتەيىك دەدىم ارىسقا. بۇگىن بۋىنىپ-ءتۇيىنىپ جولعا شىقتىق بالا-شاعامىزبەن. ءۇيىمىز قانداي بولسا دا تازالاپ، كىرىپ الامىز. كومەك بولسا بولدى، بولماسا امالدايمىز دا»، - دەيدى قاريا.