ءوز ءومىرىمدى مەملەكەتتىك تىلگە ارنادىم - ۆيكتوريا كامالەتدينوۆا
پاۆلودار. قازاقپارات - ۇلتى ورىس ءتىل مامانى 20 جىل بويى ەكىباستۇزدا قازاق ءتىلىنىڭ ناسيحاتتالۋىنا ۇلەس قوسىپ كەلەدى، دەپ حابارلايدى pavlodarnews.kz.
پاۆلودار وبلىسىنىڭ قازاقستان حالقى اسسامبلەياسىنىڭ XV سەسسياسىندا سويلەگەن «جاس ەكىباس» جوباسىنىڭ اۆتورى ۆيكتوريا كامالەتدينوۆا ءوزىن باقىتتى سەزىنەتىنىن ايتتى. - كەز كەلگەن زايىرلى مەملەكەتتىڭ الەۋمەتتىك جانە ەكونوميكالىق دامۋى حالىق بىرلىگى مەن كەلىسىمىنسىز مۇمكىن ەمەس، - دەيدى ۆيكتوريا كامالەتدينوۆا.
- قازەكەمنىڭ «باقىتتىڭ كىلتى - ەڭبەكتە» دەگەن تاماشا ءسوزى بار. مەن ءوزىمدى وتە باقىتتى اداممىن دەپ سانايمىن. سەبەبى - ۇلتىم ورىس بولۋىنا قاراماستان، ماعان قازاق ءتىلىنىڭ سالاسىندا قىزمەت ەتۋ، ونى دارىپتەۋ ءھام ناسيحاتتاۋ ءساتى ءتۇستى. ءومىرىمدى مەملەكەتتىك تىلگە ارنادىم. ەكىباستۇزدا 20 -جىلداي بويى ءتىل سالاسىندا ەڭبەك ەتىپ كەلە جاتقان لينگۆيست سولتۇستىك، ونىڭ ىشىندە پاۆلودار وبلىسىنا قاتىستى قالىپتاسقان ستەرەوتيپتەرگە قارسى. - بايقاعانىم، وزگە وڭىرلەردە تۇراتىن وتانداستارىمىزدا «پاۆلودار مەن ەكىباستۇز ورىستانعان» دەگەن بۇرىس پىكىر قالىپتاسقان، - دەپ اعىنان جارىلدى ۆيكتوريا كامالەتدينوۆا. - مەن ولارعا «تاۋەلسىزدىك جىلدارىندا وزگە ۇلت وكىلدەرى، كەرىسىنشە قازاقتانىپ كەتكەن جوق پا» دەپ ازىلدەيمىن. وسى ستەرەوتيپ نامىسىما ءتيىپ، ءسوزدى قويىپ ناقتى ىسكە كوشتىم.
ۆيكتوريا كامالەتدينوۆانىڭ ايتۋىنشا، حالىقتى قازاق تىلىنە باۋلۋ ءۇشىن گرامماتيكانى ۇيرەتۋدەن گورى، اۋىزەكى تىلدە سويلەتە باستاۋ كەرەك. - گرامماتيكانى قانشا ۇيرەتسەڭ دە، حالىق قازاقشا سويلەپ كەتپەيتىنىن انىق اڭعارعاننان كەيىن كوممۋنيكاتيۆتىك، سيتۋاتيۆتىك ءادىستى قولدانامىن. جاستار جىلى اياسىندا قاراپايىم ماماندىق يەلەرىن ناسيحاتتاۋ جونىندەگى «جاس ەكىباس» جوباسىن جۇرگىزۋدى باستادىم. وعان ەكىباستۇز اكىمدىگىنىڭ قولداۋ كورسەتكەنى ءۇشىن العىس بىلدىرەمىن.
ۆيكتوريا كامالەتدينوۆانىڭ ەڭبەگىن جوعارى باعالاعان وبلىس اكىمى بولات باقاۋوۆ پاۆلودار جانە ەكىباستۇز قالالارىنىڭ «دوستىق ۇيلەرى» نەگىزىندە «سيتۋاتيۆتىك قازاق ءتىلى» جوباسىن ازىرلەيتىن اۆتورلىق ۇجىمعا ەنۋگە شاقىردى.