پەتروپاۆلدا اۆتوبۋس جۇرگىزۋشىلەرىن بوپسالاعان «بلوگەر» ۇستالدى

س ق و پوليتسيا دەپارتامەنتى باسپا ءسوز قىزمەتىنىڭ حابارلاۋىنشا، پەتروپاۆلدىق كاسىپكەر ءوزىن 38 جاستاعى تۇرعىننىڭ بوپسالاعانى جونىندە ارىزدانعان.

«قالا تۇرعىنى الەۋمەتتىك جەلىگە قوعامدىق كولىكتەگى كەلەڭسىز جاعدايلاردى ءتۇسىرىپ، سالىپ وتىرعان. ياعني، جۇرگىزۋشىنىڭ تەمەكى تارتۋى، سالونداعى بىلىق - مۇنىڭ ءبارى كەيىن ينتەرنەتكە جۇكتەلگەن. وسىلايشا جولاۋشىلاردىڭ قۇقىعىن قورعاپ كەلگەن «بلوگەر» كەيىن بوپسالاۋعا كوشكەن. زارداپ شەگۋشىنىڭ ايتۋىنشا، ول باعىتتىق اۆتوبۋستاردىڭ يەلەرىنە بەلگىلى ءبىر سوما ءۇشىن ءوز رايىنان قايتىپ، اشكەرەلەيتىن ارەكەتتەردەن باس تارتامىن دەگەن. ءار اۆتوبۋستان 200 مىڭ تەڭگە سۇراپتى»، - دەيدى ءتارتىپ ساقشىلارى.

كاسىپكەرلەردىڭ ءبىرى سۇراعان اقشاسىن كۇدىكتىنىڭ ەسەپشوتىنا اۋدارعان. ال ەكىنشى كاسىپكەر 286 مىڭ تەڭگەنى بەرىپ جاتقان كەزدە بوپسالاۋشى قولعا ءتۇستى.

«پەتروپاۆل قالاسىنىڭ 38 جاستاعى تۇرعىنى بۇعان دەيىن دە مۇلىكتىك جانە ادامنىڭ جەكە باسىنا قارسى قىلمىسى ءۇشىن بىرنەشە رەت سوتتى بولعان. بۇل فاكتى ق ر ق ك 194-بابىنىڭ 2-ءبولىمى «بوپسالاۋ» بويىنشا سوتقا دەيىنگى تەرگەپ-تەكسەرۋدىڭ ءبىرىڭعاي تىزىلىمىنە ەنگىزىلدى. كۇدىكتى قاماۋعا الىندى»، - دەيدى س ق و پ د تەرگەۋ باسقارماسىنىڭ باستىعى قايرات قاسىمبەكوۆ.

قازىر زارداپ شەككەندەردىڭ سانى مەن كەلگەن شىعىن مولشەرى انىقتالىپ جاتىر.