كوپبالالى انالارعا قولداۋ بولعان باستاما

نەسيە الىپ، تومەن تۇرمىستىق جاعدايىنا بايلانىستى تولەي الماي وتىرعان كوپبالالى انالار مەملەكەت تاراپىنان جەڭىلدىك جاسالاتىنىنا قاتىستى پىكىر بىلدىرۋدە. ەلىمىزدە وسىنداي ماسەلەسى بار 500 مىڭعا جۋىق ازامات تىركەلگەن.

«مەملەكەت باسشىسىنىڭ ەل تۇرعىندارىنىڭ نەسيەلەرىن جابۋعا جەڭىلدىك جاسايتىن باستاماسىن ەستىپ، قۋاندىم. وتباسىن اسىراۋشى ازاماتتاردىڭ جالاقىلارى ايلىق نەسيە كولەمىن تولەگەننەن كەيىن، تۇرمىستىق قاجەتتىلىكتەرگە، جالدامالى پاتەرىنە جەتپەي جاتادى. مەنىڭ 5 بالام بار، بىرەۋى مۇگەدەك. ەمدەتۋگە قارجى تاپپاي، نەسيە العان كەزدەرىمىز بولدى. سوندىقتان، نەسيەنى تولەۋگە مەملەكەت جاردەم جاساسا، وسىنداي ماسەلەلەرى بار ازاماتتارعا قولداۋ بولماق»، - دەگەن پىكىر بىلدىرەدى كوپبالالى انا ساندۋعاش مىرزابەكوۆا.

ەسكە سالا كەتەيىك، مۇنداي جەڭىلدىك كوپبالالى وتباسىلار، اسىراۋشىسىنان ايرىلۋ جاعدايىنا بايلانىستى تولەم الاتىن وتباسىلار، مۇگەدەك بالالارى بار، 18 جاستان اسقان، بالا جاسىنان مۇگەدەكتەر بار وتباسىلار، اتاۋلى مەملەكەتتىك الەۋمەتتىك كومەك الاتىندار، جەتىم بالالار، اتا-اناسىنان كامەلەتتىك جاسقا دەيىن ايىرىلعان، جيىرما توعىز جاسقا تولماعان، اتا-انانىڭ قامقورلىعىنسىز قالعان بالالارعا بەرىلەدى.