قايسىسى پايدالى: مال ەتى مە، بالىق ەتى مە؟
عالىمدار قازىر ەتتىڭ ورنىنا بالىق تاعامدارىن جەۋ ابزالىراق ەكەنىن ايتۋدا. ءبىراق بۇعان قارسى شىعۋشىلار دا بار. ولاردىڭ پىكىرىنشە، بالىقتىڭ ساپاسى بۇرىنعىداي ەمەس. ەكوجۇيەنىڭ بۇزىلۋىنان، مۇحيتتىڭ لاستانۋىنان بالىق ەتىندە مەتيل سىنابى بار ەكەن. بالىقتىڭ قۇرامىندا پايدالى مايلار مەن D دارۋمەنى بار. ال كادىمگى ەتتە ادامعا قاجەتتى تەمىر بار. سوندىقتان ولاردىڭ قايسىسىن كوبىرەك تۇتىنۋ ادام اعزاسىنا پايدالىراق بولاتىنىن تالداپ كورەيىك.
دانيا تەحنيكالىق ۋنيۆەرسيتەتى عالىمدارى بالىق پەن مال ەتىنىڭ بارلىق ارتىقشىلىعى مەن كەمشىلىكتەرىن سالىستىرا وتىرىپ ادامعا بالىق ەتىنەن جاسالعان تاعامدار پايدالى ەكەنىن دالەلدەپ شىققان. ءبىراق بالىق ەتى ادامنىڭ جاسىنان قاراي پايدالى بولاتىنىن ەستەن شىعارماعان ءجون. مايلى بالىق، مىسالى سەلد، سكۋمبريا جەۋ نەمەسە مايسىز بالىق پەن مايلى بالىقتى ارالاستىرىپ تۇتىنۋ ادام اعزاسىنا وتە پايدالى.
ال، تەك، مايسىز بالىق جەسەڭىز، ونىڭ پاداسى دا از بولادى. سەبەبى، مايلى بالىق قۇرامىندا پايدالى ومەگا- قىشقىلى جوعارى. باستىسى، تۋنەتس بالىعىن جەمەۋ كەرەك. ونىڭ قۇرامىندا ومەگا- قىشقىلى از، ونىڭ ۇستىنە قۇرامىندا مەتيل سىنابى جوعارى.
بالىق قۇرامىنان تابىلعان مەتيل سىنابى جۇرەك اۋرۋلارىنىڭ تۋىنداۋىنا سەبەپ بولىپ، مي مەن جۇيكە جۇيەسىنىڭ دامۋىنا كەرى اسەرىن تيگىزىپ، كوگنيتيۆتى فۋنكتسيالاردىڭ تومەندەۋىنە اكەلەدى. اسىرەسە جۇكتى ايەلدەر تۋنەتس بالىعىن جەمەۋى كەرەك. سەبەبى تۋنەتس جۇكتىلىكتىڭ دامۋىن باياۋلاتادى. ال مايلى بالىقتاردى پايدالانۋ كەرىسىنشە جۇكتى ايەلدەرگە پايدالى.
سول سياقتى 50 جاستان اسقان ەرلەر دە مال ەتىنەن گورى بالىق ەتىن جەگەنى ابزالىراق. ادام دەنساۋلىعىن جاقسارتۋ ءۇشىن ەتتەن باس تارتىپ اپتاسىنا 350 گرامم بالىق ەتىن جەگەن دۇرىس. مۇنداعى بالىقتىڭ 200 گراممى مايلى بالىق بولۋى شارت. سونىمەن بىرگە، عالىمدار بالىق ەتىن پايدالانۋ D دارۋمەنى جەتىسپەۋشىلىگىنەن زارداپ شەگەتىندەردى ازايۋىنا الىپ كەلەتىنىن ايتادى. سونىمەن بىرگە زەرتتەۋ جۇرگىزگەن عالىمدار: "ەشكىمدى ۆەگەتاريان بولۋعا شاقىرمايمىز" دەيدى.
وڭدەلگەن ەت ورنىنا قۇس ەتىن جەۋگە بولادى. الايدا مۇنداي وزگەرىستەردىڭ جالپى اسەرىن انىقتاۋ ءۇشىن جاڭا زەرتتەۋ قاجەت.
