پروكۋراتۋرا داۋىس بەرۋ كۇنىندە قانداي زاڭ بۇزۋ ارەكەتتەرىن انىقتادى

«پروكۋراتۋرا اكىمشىلىك قۇقىقبۇزشىلىق بەلگىلەرىنىڭ بار ەكەندىگىن انىقتاعان ماتەريالدارعا جەكە توقتالىپ وتەيىن. ولاردىڭ جالپى سانى 19 بولدى. ءىستىڭ باسىم بولىگى (12) ۋچاسكەلىك سايلاۋ كوميسسياسى مۇشەلەرىنىڭ ازاماتتارعا وزگە تۇلعانىڭ اتىنان داۋىس بەرۋ ءۇشىن بيۋللەتەندەردى بەرۋىنە قاتىستى. 6 ماتەريال سايلاۋشىلاردىڭ بىردەي سايلاۋ قۇقىعى تالاپتارىن بۇزۋىمەن بايلانىستى بولدى. ياعني، بۇل جاعدايدا ولار وزگە سايلاۋشىلاردڭ ورنىنا داۋىس بەرمەك بولدى» ، - دەدى زاۋرەش بايمولدينا ورتالىق سايلاۋ كوميسسياسىنىڭ وتىرىسىندا.

ونىڭ ايتۋىنشا، ءىس جۇزىندە بارلىق دەرەكتەردە سايلاۋشى ۋچاسكەلىك سايلاۋ كوميسسياسىنىڭ مۇشەسىنەن ءوزىنىڭ وتباسى مۇشەلەرى ءۇشىن داۋىس بەرۋگە مۇمكىنشىلىك جاساۋىن وتىنگەن.

 «بۇل اسىرەسە اۋىلدىق جەرلەردە بارىنشا وزەكتى بولدى. جۇبايى، بالالارى ءۇشىن داۋىس بەرۋ كوپتەگەن اۋىل تۇرعىندارى ءۇشىن سايلاۋ زاڭناماسىن بۇزۋشىلىق بولىپ ەسەپتەلىنبەيدى. 1 ماتەريال سايلاۋالدى ۇگىت جۇرگىزۋ ەرەجەسىن بۇزۋمەن بايلانىستى بولدى. اتالعان بۇزۋشىلىقتاردىڭ 40 پايىزدان استامى، ناقتى ايتقاندا 8 ءى تۇركىستان وبلىسىنا تيەسىلى. الماتى مەن اتىراۋ وبلىستارىندا، نۇر- سۇلتان مەن الماتى قالالارىندا ەكىدەن ءىس تىركەلدى. بۇل ىستەر قۇزىرەتتى ورگانداردىڭ قاراۋىندا جاتىر. ءبىز ولاردان ءتيىستى اقپاراتتاردى سۇرايمىز» ، - دەدى ق ر و س ك مۇشەسى.