باس پروكۋراتۋرا: الەۋمەتتىك جەلىدە جاسىرىن ۇگىت جۇمىستارى بايقالادى

بۇل تۋرالى بۇگىن ق ر باس پروكۋرورىنىڭ ورىنباسارى بولات دەمبايەۆ ايتتى، دەپ حابارلايدى قازاقپارات ءتىلشىسى.

«وزدەرىڭىز دە بىلەتىندەي، سايلاۋ كۇنىندە سايلاۋ الدى ۇگىت-ناسيحاتىن جۇرگىزۋگە تىيىم سالىنعان. بۇل ءۇشىن جەكە تۇلعالارعا 15 ا ە ك، زاڭدى تۇلعالارعا 30 ا ە ك كولەمىندە ايىپپۇل قاراستىرىلعان. قازىرگى ۋاقىتتا تىيىم سالىنعانىنا قاراماستان جەكەلەگەن ازاماتتاردىڭ الەۋمەتتىك جەلىدە جاسىرىن تۇردە ۇگىت جۇرگىزۋى بايقالادى. ازاماتتىڭ داۋىس بەرىپ، بيۋللەتەنىن سۋرەتكە ءتۇسىرىپ جاريا ەتۋ دەرەكتەرى بار. بۇل ۇگىت سانالادى»، - دەدى باس پروكۋروردىڭ ورىنباسارى ورتالىق سايلاۋ كوميسسياسىنداعى بريفينگتە.

ونىڭ ايتۋىنشا، بايقاۋشىلار وتىرىسى حاتتاماسىنىڭ جاريا ەتىلۋ دەرەگى بار. زاڭعا سايكەس بايقاۋشى حاتتامامەن تەك قانا تانىسۋى قاجەت.

«ءبىراق، ولار ونى ب ا ق-تا جانە الەۋمەتتىك جەلىدە جاريا ەتۋدە. بۇعان جول بەرۋگە بولمايدى، بۇل دا جاسىرىن جاريالانىم. ول ءۇشىن دە ايىپپۇل قاراستىرىلعان. حاتتاما داۋىس بەرۋ اياقتالعاننان كەيىن عانا قابىرعاعا ىلىنەدى. ساعات 20-00 گە دەيىن حاتتامانى جاريا ەتۋگە بولمايدى. بۇل بارلىعىنا، ونىڭ ىشىندە بايقاۋشىلارعا دا قاتىستى»، - دەدى ول.

باس پروكۋروردىڭ ورىنباسارى انىقتالعان بارلىق فاكتى بويىنشا تەكسەرۋ جۇرگىزىلىپ، شارا قولدانىلاتىندىعىن ايتتى.

«ءبىر ادامنىڭ فەيسبۋگىندە قوسانوۆقا داۋىس بەرۋگە شاقىرۋ ورنالاستىرىلعان. ءبىز ونىڭ پاراقشاسىنا كىمدەردىڭ كىرگەنىن تەكسەرەمىز. داۋىس بەرۋ كۇنىندە بارلىق وتىنىشتەر دەرەۋ قارالاتىن بولادى. جالپى، داۋىس بەرۋ تىنىش ءوتىپ جاتىر، قوعامدىق ءتارتىپتى ورەسكەل بۇزۋ جوق. جاسىرىن سايلاۋ الدى ۇگىت- ناسيحات جۇرگىزۋگە جول بەرىلمەيتىندىگىن ەسكەرتەمىن»، - دەدى بولات دەمبايەۆ.