اقتوبەدە الىپ بۇركىتتىڭ ءمۇسىنى ورناتىلدى

بۇل ءمۇسىندى جاساۋعا 1999 -جىلعى مەكتەپ تۇلەكتەرى قارجى ءبولدى، دەپ حابارلايدى قازاقپارات ءتىلشىسى.

اقتوبە وبلىسى مۇعالجار اۋدانى قۇدايبەرگەن جۇبانوۆ اۋىلدىق وكرۋگىنىڭ مەكتەبىن بىتىرگەن تۇلەكتەر تۋعان اۋىلىنا الىپ بۇركىت ەسكەرتكىشىن سىيلادى. اۋىل حالقى دا كومەكتەسىپ، نىساندى تۋريزمدى دامىتۋدىڭ ءبىر كوزىنە اينالدىرۋدى ماقسات ەتىپ وتىر.

«بۇعان دەيىن دە اۋىلدا بۇركىتتىڭ ەسكەرتكىشى بولدى. 80-جىلدارى ورناتىلعان ءمۇسىن شوگىپ، قاناتى قايىرىلىپ، ۇگىتىلە باستاعاندا قايتا جاڭارتىلعان، ءبىراق بۇزىلىپ قالدى. سۋرەتشى مۇرات نابيەۆكە ۇسىنىس بەرىپ، قايتا قالپىنا كەلتىرۋ ۇسىنىسىن ايتقان ەدىم، ءبىراق ءمۇسىن جارامسىز بولدى. جىل باسىندا 1999 -جىلعى مەكتەپ تۇلەكتەرى اۋىل اكىمدىگىنە حابارلاسىپ، «تۋعان جەرگە تاعزىم» اكسياسىمەن كومەك بەرەتىندەرىن ايتتى. وسى يدەيانى ۇسىنعان كەزدە بىردەن قولدادى. ارماتۋرا، مەتالل تورلار مەن سەمەنتتى تۇلەكتەر الىپ بەردى. تۇعىرىن دايىنداۋ، بۇركىتتىڭ ءمۇسىنىن جەتكىزۋ جۇمىستارىنا اۋىل تۇرعىندارى كومەكتەستى. ال اۋدان اكىمدىگى بۇركىتتى ورناتۋعا كران بەردى»، - دەيدى قۇدايبەرگەن جۇبانوۆ اتىنداعى اۋىلدىق وكرۋگتىڭ اكىمى كامشات ەرماعامبەتوۆ.

بۇركىت ءمۇسىنىنىڭ بيىكتىگى - 3 مەتر، تۇعىرىمەن ەسكەرتكىش 4 مەتر بولدى. ال قاناتىن جايعان قۇستىڭ ەنى 7 مەترگە جەتەدى. ەسكەرتكىشتىڭ جالپى سالماعى - 5 توننا.

«اۋىلدا ورقاش تابيعي قورىعى بار. تۋريزمدى دامىتۋعا ىڭعايلى ورماندا جىرتقىش قۇستىڭ 9 ءتۇرى بار. ولار: قارا كەزقۇيرىق، كادىمگى تىلەمىش، جامانسارى، دالا قىرانى، بەتقاينار، ساز قۇلادىنى، شالعىن قۇلادىنى جانە كادىمگى كۇيكەنتاي. قورىق ور، جەم جانە تەمىر وزەندەرى اۋداندارىندا ورنالاسقان. قىزىل كىتاپقا ەنگىزىلگەن تەڭگەجاپىراق ءشىقشوبى بار. سوندىقتان، بۇركىت اۋىلدىڭ سيمۆولىنا اينالىپ، 10 شاقىرىم قاشىقتىققا ەسكەرتكىش ورناتىلدى. تاياۋدا رەسپۋبليكالىق اڭشىلار مەن بالىقشىلار، ساياتشىلاردىڭ سيمپوزيۋمى ءوتتى. سول ءۇردىستى جالعاستىرىپ، ەكوتۋريزممەن كيىز ءۇي ورناتىپ، ساۋمال تۋر، جاياۋ ءجۇرۋ تۋرى سەكىلدى بىرنەشە باعىتتى قامتىعىمىز كەلەدى. كاسىپكەرلەردىڭ قىزىعۋشىلىعى ارتىپ كەلەدى»، - دەيدى وكرۋگ اكىمى كامشات ەرماعامبەتوۆ.