كۇن جۇيەسىندەگى جاڭا عالامشارعا اتاۋ بەرىلدى

نۇر- سۇلتان. قازاقپارات - كۇن جۇيەسىندەگى جالپىعا تانىمال ەمەس پلانەتانىڭ ءبىرى اتاۋىن الدى. وسى كۇنگە دەيىن اتاۋسىز كەلگەن ەرگەجەيلى عالامشار پلۋنتوننىڭ جانىندا اينالادى.

 سول سەبەپتى عالىمدار ونى پلۋتونويدتار توبىنا قوسادى. ال پلۋتونويدتار ءوز كەزەگىندە كويپەر بەلدەۋىن «مەكەندەيدى». ءبىزدىڭ جۇيەنىڭ بۇل وبلىسى تەك 1992 -جىلى اشىلعان ەدى. عالىمدار ولاردى كۇن جۇيەسى پايدا بولعان "قۇرىلىس ماتەريالدارىنىڭ" قالدىعى - استەرويدتار دەپ ساناعان. ءبىراق عىلىمنىڭ دامۋىمەن استەرويد دەگەن بولجام قاتە بولىپ شىقتى. بۇل وبلىستا عالامشاردىڭ بار ەكەنى بەلگىلى بولدى. ال اتاۋسىز ەرگەجەيلى عالامشار وسىدان 12 -جىل بۇرىن عانا اشىلعان. ونىڭ ديامەترى  1500 شاقىرىمدى قۇرايدى. سالىستىرمالى تۇردە جەردىڭ ديامەترى -  13000 شاقىرىم.

 اتالمىش پلانەتانى اشقان كاليفورنيا تەحنولوگيالىق ينستيتۋتىنىڭ استرونومى مايكل براۋن پلانەتولوگيالىق قوعامنىڭ سايتىندا عالامشارعا اتاۋ تاڭداۋ ءۇشىن كونكۋرس ۇيىمداستىردى. سكانديناۆيالىق قۇداي ۆيلي، وديننىڭ اعاسى، ەجەلگى نەمىس قۇدايى حولدا ۇسىنىلعان. الايدا قىتاي ميفولوگياسىنىڭ وكىلى گۋنگۋن جەڭىسكە جەتتى. اڭىز بويىنشا سۋ قۇدايى جەردىڭ وربيتاعا بۇرىشپەن ءيىلىپ تۇرعانىنا «كىنالى» جانە جەردەگى بارلىق اپاتتىڭ سەبەپكەرى. مايكل براۋن - پلۋتون ايماعىن زەرتتەۋىمەن تانىمال. ونىڭ كويپەر جولاعىندا ورنالاسقان پلۋتوننان دا ۇلكەن UB313 (ەريدا) اتتى پلانەتانى تاۋىپ، حالىقارالىق استرونوميا وداعىنا باعىتتاپ، «نە ەريدا كۇن جۇيەسىندەگى ونىنشى پلانەتا اتانادى، نە پلۋتون پلانەتا بولۋدان قالادى» دەپ رەسمي تۇردە حات جازعان بولاتىن. ارينە، بۇل جايتتان كەيىن ەريدانى ەلەمەي قالۋ مۇمكىن بولمادى. سوندىقتان، الەم استرونومدارى بىرىگە وتىرىپ، «ەرگەجەيلى پلانەتا» اتتى سۋ جاڭا كلاسس ويلاپ تاپتى دا، قۇرامىنا پلۋتون، ەريدا، تسەرەرا، حاۋمەا جانە ماكەماكەنى كىرگىزەدى. سونىمەن، كۇن جۇيەسىندە قازىر 8 نەگىزگى پلانەتا، 5 ەرگەجەيلى پلانەتا بار.

Massaget.kz