ورازا ايت مەيرامى جايىندا
ءبىز مۇمكىندىگىنشە اتالمىش ايدىڭ قايىر- بەرەكەسىنە بولەنىپ، ساۋابىنا كەنەلۋگە تىرىسىپ باقتىق.
كوزدى اشىپ- جۇمعانداي بوپ ءبىر اي ورازا وتە شىقتى، ەندى، مىنە، رامازان ايىمەن دە قيماي قوشتاساتىن كەز كەلدى. الايدا بۇل قاسيەتتى اي ورازا ايت مەرەكەسىنە ۇلاساتىنى بەلگىلى.
«مەيرام» دەگەن ءسوز ادام جانىنا ءبىر تىنىشتىق ۇيالاتاتىنى ءسوزسىز.
ءبىز تۋعان-تۋىستارىمىزبەن، دوستارىمىزبەن كەزدەسەمىز. ورازا ايتتىڭ قۇرمەتىنە ءبىر-بىرىمىزگە سىيلىق تارتۋ ەتىپ جاتامىز. مىنە، سول سەبەپتى دە مەيرام دەگەن ءسوزدى ەستي سالا ءبىزدىڭ جۇرەكتەرىمىزدى قۋانىش كەرنەي جونەلەدى.
ءبىزدىڭ اسىل ءدىنىمىزدىڭ شەگىنەن شىعا ساۋىق-سايران قۇرۋعا، كوڭىل كوتەرۋگە جول بەرىلمەيدى. الايدا اللا تاعالانى ەسكە الا وتىرىپ شاتتانۋدىڭ ورنى بولەك. مەرەكەلىك كۇندەر اللا تاعالانىڭ بىزگە ءناسىپ ەتكەن يگىلىگى ءارى پايعامبارىمىزدىڭ (ﷺ) سۇننەتى رەتىندە قابىلدانۋى ءتيىس.
اقيقاتىندا، اتالمىش مەيرامنىڭ ەكى ۇلكەن مىندەتى بار. ولار: ايت نامازىن وقۋ جانە ءپىتىر ساداقا بەرۋ.
ءپىتىر ساداقا ورازامەن بىرگە اللا تاعالا تاراپىنان ۇيعارىلعان. ءپىتىر ساداقا ءۋاجىپ بولىپ تابىلادى، ونى ايت كۇنى بەرۋگە نە بولماسا مەيرامنىڭ الدىنداعى كۇندەرى، ياعني، رامازان ايىندا دا بەرۋگە بولادى.
مەيرام - بۇل ءبىر جۇبانىش. انانىڭ ايالى دا جىلى قۇشاعىنان سۋىرىپ الىنعان سابيدەي، مۇمىندەر دە رامازانمەن قيماي حوش ايتىسادى. الايدا الدىمىزدا كۇتىپ تۇرعان ورازا ايت مەيرامى ءبىزدىڭ جانىمىزعا تىنىشتىق پەن قۋانىش سىيلايدى.
مەيرام - بۇل ءبىر ريزاشىلىق. ءبىر اي بويى اللانىڭ كەشىرىمىن الۋ، ونىڭ مەيىرىمىنە بولەنۋ جانە توزاقتان قۇتىلۋ مۇمكىندىگى ءۇشىن ريزاشىلىق تانىتۋ. مەيرام - ماڭگىلىك ومىرگە دايىندىق. جۇماقتا قىزعانىشتىڭ، الداۋ- ارباۋدىڭ، وشپەندىلىكتىڭ، ارازدىقتىڭ بولمايتىنى سياقتى مەيرام كۇندەرى دە اۋىزبىرلىك، تىنىشتىق ورنايتىن بولادى.
مەيرام كۇندەرى - كۇنالاردىڭ كەشىرىلۋىنىڭ مۇمكىندىگى، جۇرەكتەردىڭ مەيىرىمدىلىككە تولاتىن كەزى.
مەيرام كۇندەرى ءبىز ەشكىمدى رەنجىتپەۋگە، بىرەۋدىڭ كوڭىلىن قالدىرماۋعا ءارى ۇنەمى كۇلىمسىرەپ جۇرەمىز. ورازا ايت مەيرامى اللا تاعالا رازىلىعىنا كەنەلۋگە زور مۇمكىندىك بەرەتىن كەز. الايدا رامازان ايىن لايىقتى وتكىزگەن جاندار عانا بۇل مەيرامنىڭ ءقادىر- قاسيەتىن تولىققاندى تۇسىنە الادى.
ەستەرىڭىزدە بولسىن، جۇما - ءبىر اپتانىڭ مەيرامى بولسا، ورازا ايت پەن قۇربان ايت - ءبىر جىلدىڭ مەيرامى...