بۇرىنعى تۇرمە باسشىلارى ۇزاق مەرزىمگە سوتتالدى

نۇر-سۇلتان. قازاقپارات - جەكە كاسىپكەردەن پارا العان جامبىل وبلىسى بويىنشا ق ا ج ج د-158/7 تۇزەۋ مەكەمەسىنىڭ باسشىسى مەن ونىڭ ورىنباسارى سوتتالدى، دەپ حابارلايدى قازاقپارات.

ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ مالىمەتىنشە، 31 -مامىر كۇنى تاراز قالالىق №2 -سوتىنىڭ ۇكىمىمەن مەكەمە باسشىسى پارا العانى ءۇشىن كىنالى دەپ تانىلعان. سوت ۇكىمىنە سايكەس ول مەملەكەتتىك لاۋازىمدى قىزمەت اتقارۋ قۇقىعىنان ءومىر بويىنا ايىرىلىپ، 7 جىل 6 اي باس بوستاندىعىنان ايىرۋ جازاسىنا كەسىلدى.

سونىمەن قاتار، «ادىلەت پودپولكوۆنيگى» اتاعىنان ايىرىلدى.

ال ونىڭ ورىنباسارى دا «ادىلەت پودپولكوۆنيگى» ارنايى اتاعىنان، ءومىر بويى مەملەكەتتىك لاۋازىمدى قىزمەت اتقارۋ قۇقىعىنان ايىرىلىپ، جازاسىن 7 جىل اباقتىدا وتەيتىن بولادى.